ევროპული საქართველოს ზუგდიდის მაჟორიტარობის კანდიდატი, გიგი უგულავა, ზუგდიდის რაიონის სოფელ ალერტკარში იმყოფებოდა, სადაც ის ადგილობრივების პრობლემებს გაეცნო და მათ გარდამტეხი ცვლილებების გეგმა გააცნო.

უგულავას თქმით, ამ სოფელში ადამიანებს არ მიეწოდებათ სასმელი წყალი, ასევე არის მძიმე ინფრასტრუქტურული პრობლემები, რაც ადგილობრივებს უზღუდავს გადაადგილების საშუალებას. უგულავამ თქვა, რომ სწორედ ასეთი მძიმე პრობლემებია ოცნების ხელისუფლების სახე, რომელსაც 31 ოქტომბერს სჭირდება გარდამტეხი ცვლილებები.

"ოცნების მმართველობის მთელი სიმრუდე და უტვინობა ძალიან კარგად ჩანს აქ, სოფელ ალერტკარში. რამდენიმე წლის წინ ააშენეს ავზი, აქ ძალიან დიდი პრობლემაა წყლის, მაგრამ მოსახლეობის უდიდეს უმრავლესობას, ისევე როგორც თვითონ იმ ავზს, არ უნახავს წყალი, რადგან ისე გააკეთეს, რომ წყალი რეალობაში არ არის. დაიხარჯა დიდი ფული, მაგრამ წყალი ისევ არ არის.

ამავე დროს, ნაწილ სოფელში არის მხოლოდ ცენტრალურად გაკეთებული გზა და უდიდესი ნაწილი ისეთ მდგომარეობაშია, რომ ოდნავი წვიმის შემთვევაში ადამიანი ვერ გამოვა, სასწრაფოზე საუბარიც კი არ შეიძლება.

ეს ხდება მაშინ, როდესაც, მაგალითად, ერთი თვის წინ, ზუგდიდის ცენტრში, ბულვარის გარშემო, აყარეს ასფალტი და დააგეს ახალი ასფალტი. სუფთა წინასაარჩევნო, სამარიაჟო ტრიუკია, იმიტომ, რომ ძველი ასფალტი გაისადაც იმუშავებდა და იმის მერე პატარა შეკეთებები შეიძლება ყოფილიყო საჭირო. რა საჭირო იყო იმის გაკეთება, როდესაც ამ სოფელში მთელი დარჩენილი გზის მონაკვეთს ამ თანხით გააკეთებდნენ.

ეს არის არასწორი პრიორიტეტები. ეს არის ის, რომ ქვეყანა ერთი კაცის ხუშტურზეა მიმართული და მარტო ისეთი რამეები უნდა გაკეთდეს, რაც ჩანს და არა ისეთი, რაც ხალხს სჭირდება. ეს არის გარდამტეხი ცვლილებები. ზუსტად ეს უნდა შეიცვალოს და ალერტკარი არის ამის კლასიკური მაგალითი", — განაცხადა უგულავამ.