ევროპული საქართველოს ზუგდიდის მაჟორიტარობის კანდიდატი, გიგი უგულავა, ქართუ ბანკის ყოფილი ვიცეპრეზიდენტის, ელდარ გოგოლაძის ინტერვიუს ეხმაურება. მისი თქმით, ამ ინტერვიუში ნათლად გამოჩნდა, რომ ივანიშვილი არის სახიფათო ადამიანი და მისი ხელისუფლებაში დატოვება სახიფათოა.

უგულავა აღნიშნავს, რომ ამ ინტერვიუთი კარგად გამოჩნდა ანაკლიის პორტის მშენებლობის შეჩერების რუსული კვალი.

"ბატონი ელდარ გოგოლაძის განცხადებები და აღიარებები იმით არის მნიშვნელოვანი, რომ ის ობიექტურად იყო ერთ-ერთი ახლო პირი ივანიშვილის გარემოცვის, წლების განმავლობაში ის იყო დაცვის უფროსი და მთელ ქართუს უსაფრთხოებაზე პასუხისმგებელი. ჩვენ დღევანდელობიდანაც ვიცით, რომ დაცვის უფროსები და ავტორიტარიზმისკენ მიდრეკილი ადამიანები ყველაზე ახლოს არიან ხოლმე.

ანგოლაგეიტი, ეს ცნობილი ამბავია და კიდევ ერთი დადასტურება, რომ იქ მონაწილეობდა. საყურადღებო და ნიშანდობლივი იყო მოსკოვური ცხოვრების დეტალები და მათ შორის, ფსიქო პორტრეტი, რაც მან დახატა ივანიშვილის, რაც ყველამ, საზოგადოებამ, საჯაროდ ნელ-ნელა უკვე ვნახეთ, მაგრამ, როდესაც ამაზე საუბრობს ადამიანი, რომელიც უშუალოდ დაყვებოდა, მას, ეს ნიშანდობლივია. ასევე, იყო გვარები ნახსენები, სუკოვი, პატუშევი. ასევე, მნიშვნელოვანია ანაკლიის პორტთან დაკავშირებით განცხადება, იმიტომ, რომ მაღალი ალბათობით არსებობდა ეჭვი, რომ რუსების გამო გააჩერა აქ პორტის მშენებლობა და ეს კიდევ ერთხელ დადასტურდა რომ ასეა და რეალურად ზუგდიდს და ქვეყანას მოუსპო განვითარების პერსპექტივა.

ამიტომ, ძალიან საყურადღებოა და კიდევ ერთხელ მიუთითებს იმას, რომ ეს არის სახიფათო ადამიანი და სახიფათოა მისი ხელისუფლებაში დატოვება", — განაცხადა უგულავამ.