მმართველი გუნდის ერთ-ერთი ლიდერის, მამუკა მდინარაძის განცხადებით, ზუგდიდში შეიარაღებული თავდასხმის დროს ბანკში აყვანილი ერთ-ერთი მძევლის, ირაკლი კვარაცხელიას იქ ყოფნა შემთხვევითობა იყო თუ არა, ეს მომდევნო დღეებში გაირკვევა. მისი თქმით, იგი 1-10%-ით იმასაც უშვებს, რომ ეს დამთხვევა იყო.

"ფეისბუქში დაიწერა რამდენიმე პოსტი, მეც ვნახე. მეც რომ რამე არ დამაბრალონ, ფაქტებზე ვილაპარაკოთ. პოსტიდან გავიგე, მართალია თუ არა ამაზე პასუხს ვერ ვაგებ, ყოველ შემთხვევაში იწერება ეს, რომ ეს არის გვარამიას მამიდაშვილის ბავშვობის უახლოესი მეგობარი, რომელზეც გვარამიამ თქვა, ამას არ ვიცნობო. ასეა თუ არა ამას ვერ ვადასტურებ, არ ვიცი. აღმოჩნდა ეს ადამიანი, რომ ნაცმოძრაობის აქტიური მხარდამჭერია. დავარქვათ ამას დამთხვევა. მაგრამ ეს დამთხვევა არსებობს, ეს დამთხვევა მართალია თუ არა, ეს მერე ვარჩიოთ, მომდევნო დღეებში. ყოველ შემთხვევაში, ასე აღმოჩნდა, რომ ზუგდიდში ერთ-ერთი აქტიური მხარდამჭერი, გვარამიას ოჯახის წევრებთან აღმოჩნდა ახლობლური კავშირით, იგი მერიაში მუშაობდა, მაშინ როდესაც უგულავა იყო მისი ხელმძღვანელი. ეს შემთხვევითი იყო თუ არა, დღეს ამაზე ლაპარაკი ზედმეტია, ამიტომ ამას დღეს დავანებოთ თავი. ეს ფაქტი შედგა, რატომ იყო, დამთხვევა იყო თუ არა, ხვალ და ზეგ ეს ამბავი გაირკვევა", — განაცხადა მდინარაძემ ტელეკომპანია იმედის ეთერში.

ზუგდიდში, საქართველოს ბანკში შეიარაღებული თავდამსხმელი შეიჭრა და მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. თავდამსხმელი მძევლის, ირაკლი კვარაცხელიას შუამავლობით ტელევიზიებს ვიდეოზარით დაუკავშირდა.

ბოლო ინფორმაციით, ტელეკომპანია იმედის კადრებში ჩანს, რომ თავდამსხმელი, სავარაუდოდ, სამ მძევალთან ერთად შენობიდან გამოვიდა და ტერიტორია დატოვა. ამ დროისთვის უცნობია, სად და რა მიმართულებით წავიდა ის და დაკავებულია თუ არა. მომხდართან დაკავშირებით შინაგან საქმეთა სამინისტროს არანაირი განცხადება არ გაუვრცელებია.

ირაკლი კვარაცხელიამ, რომელიც ამ დროის განმავლობაში მედიას ეკონტაქტებოდა ფეისბუქგვერდზე დაპოსტა, რომ პოლიციის წარმომადგენელმა ფული მიიტანა და მძარცველთან ერთად ტერიტორიას რამდენიმე წუთში დატოვებდა. მისი თქმით, სამი კაცის გარდა, ყველა გაუშვეს. სხვადასხვა მედიის გავრცელებულ კადრებში ჩანს, რომ დანარჩენმა მძევლებმა შენობა დატოვეს და ადგილზე მიმდინარეობს საგამოძიებო მოქმედებები.

შინაგან საქმეთა სამინისტროს ინფორმაციით, ზუგდიდში, საქართველოს ბანკში შეიარაღებული პირის შეჭრის შესახებ შეტყობინება დაახლოებით 14:21 საათზე მიიღეს და ამჟამად მიმდინარეობს დამნაშავის გაუვნებელყოფის ოპერაცია. უწყების ცნობით, გამოძიება სისხლის სამართლის კოდექსის 179-ე, 236-ე და 144-ე მუხლებით დაიწყო. ეს მუხლები გულისხმობს ყაჩაღობას, ცეცხლსასროლი იარაღის მართლსაწინააღმდეგო შეძენა-შენახვა-ტარებას და მძევლად აყვანას.