დღეს, 21 ოქტომბერს, ევროპული საქართველოს ორგანიზებით თბილისსა და რეგიონებში ავტომობილებით აქცია, "დაუპიპინე ბიძინას" იმართება.

ავტომობილების აქცია უკვე დაიწყო საქართველოს დიდ ქალაქებში. ავტომობილები თბილისისკენ მოემართებიან და სიგნალებით ანიშნებენ ბიძინა ივანიშვილს, რომ მისი დრო ამოიწურა.

ევროპული საქართველოს წევრის, ირაკლი აბესაძის თქმით, ამ ფორმით ევროპული საქართველო აგრძნობინებს ბიძინა ივანიშვილს და მის ხელისუფლებას, რომ საზოგადოება უკმაყოფილოა მათი მმართველობით.

"ჩვენ სამწუხაროდ კარგად ვხედავთ და საზოგადოება ნათლად უყურებს, თუ როგორ ჩაფლავდა გახარიას და ივანიშვილის მთავრობა პანდემიასთან ბრძოლაში. ვხედავთ როგორ მძიმდება სიტუაცია, მაგრამ, არ გვინდა, რომ ივანიშვილმა ჩათვალოს, რომ საზოგადოების გულიწყრომა არ არსებობს, რომ ეს პრობლემები დაიფარა და საზოგადოება კმაყოფილია მისი მთავრობის მმართველობით.

ამიტომ, დღეს ამ ფორმით, შემდეგ დღეებში დისტანციის და უსაფრთხოების დაცვით, მათ შორის აქციების ჩატარებით, ჩვენ ივანიშვილს არჩევნების დღემდე ვაგრძნობინებთ საზოგადოების რეალურ განწყობას.

ეს არის ის ბრაზი, რომელიც არსებობს ივანიშვილის მიმართ საზოგადოებაში და მეორეა, რომ 31 ოქტომბერს საზოგადოებას აქვს არჩევანი გასაკეთებელი, თუ ვის შეუძლია გარდამტეხი ცვლილებები შეიტანოს იმ უკიდურეს სიღარიბეში, ფასების ზრდასთან მიმართებაში, ლარის გაუფასურებასთან მიმართებაში, კრიმინალის ზრდასთან მიმართებაში, პანდემიის და ადამიანების სიცოცხილის დაცვასთან მიმართებაში.

ამ ყველაფერთან მიმართებაში კონკრეტული გეგმა გააჩნია ევროპულ საქართველოს, ამიტომ დღეს ჩვენ ივანიშვილს ვემშვიდობებით, კიდევ ერთხელ ვეუბნებით, რომ მისი ჩაფლავებული მთავრობა და მმართველობა უნდა დასრულდეს და დროა გარდამტეხი ცვლილებების, რომელსაც მოიტანს ქვეყანაში 31 ოქტომბრის არჩევნები", — განაცხადა აბესაძემ.

შემაჯამებელი აქცია თბილისში, 20:00 საათზე, ბიძინა ივანიშვილის ბიზნეს-ცენტრთან გაიმართება.