მართალია, პანდემიამ მრავალი კინო თუ სატელევიზიო პროექტის წარმოება შეაჩერა, თუმცა პედრო ალმოდოვარმა მაინც შეძლო ახალი ფილმი გადაეღო, რომელიც წელს დაგეგმილ კინოპრემიერებს შორის ერთ-ერთი ყველაზე მაღალი მოლოდინების მქონე კინოსურათია.

ადამიანის ხმა (The Human Voice) — ასე ჰქვია ფილმს, რომელიც ლეგენდარული ესპანელი რეჟისორის პირველი ინგლისურენოვანი ნამუშევარი იქნება და თანაც მასში მთავარ როლს ცნობილი შოტლანდიელი მსახიობი ტილდა სუინტონი ასრულებს.

ცოტა ხნის წინ გავრცელებული ფილმის პირველი ტრეილერი ამ ორი გამორჩეული ხელოვანის თანამშრომლობით ნამდვილად საინტერესო სანახაობას გვპირდება:

ალმოდოვარმა ახალი ფილმი ამ წლის დასაწყისში დააანონსა, მასზე მუშაობა ივლისში უსაფრთხოების ზომების დაცვით დაიწყო და მისი პრემიერა სექტემბრის დასაწყისში ვენეციის კინოფესტივალზე შედგა.

ადამიანის ხმა ჟან კოქტოს ამავე სახელწოდების მქონე ერთმოქმედებიანი პიესის მიხედვით შეიქმნა, რომლის სიუჟეტიც თითქმის მთლიანად ქალის სატელეფონო საუბარზეა დაფუძნებული, რომელიც მოულოდნელად გაიგებს, რომ მისი შეყვარებული სხვა ქალზე ქორწინდება.

"ჩემთვის პატივია, ტილდასთან ერთად თანამშრომლობა. მეტსაც გეტყვით: ადამიანის ხმა ტილდას დღესასწაულია, მისი ურიცხვი და მრავალფეროვანი სამსახიობო უნარების წარმოდგენა. მისი გადაღება ნამდვილი სანახაობა იყო", — აღნიშნა ალმოდოვარმა სუინტონთან მუშაობის გამოცდილებაზე საუბრისას.

აღსანიშნავია, რომ ტილდასთან ერთად პედრო ალმოდოვარის ახალ ფილმში ვიხილავთ მოდის სახლ ბალენსიაგას ტანსაცმელსაც, რომელზეც ქართველი დიზაინერი დემნა გვასალია მუშაობდა: სუინტონის პერსონაჟს ბალენსიაგას გაზაფხული-ზაფხული 2020 წლის კოლექციიდან აცვია სამოსი.

ადამიანის ხმა მოკლემეტრაჟიანი კინოსურათია — მისი ქრონომეტრაჟი სულ რაღაც 30 წუთია და მისი პრემიერა 21 ოქტომბერსაა დაგეგმილი ესპანეთში.