პედრო ალმოდოვარის ახალ ფილმში, რომელშიც ოსკაროსანი მსახიობი ტილდა სუინტონი მთავარ როლს ასრულებს, მას ქართველი დიზაინერის, დემნა გვასალიას მიერ შექმნილი კოსტიუმი აცვია.

La Voz Humana (The Human Voice - ადამიანის ხმა) — ასე ჰქვია მოკლემეტრაჟიან ფილმს, რომელიც ალმოდოვარის პირველი ინგლისურენოვანი პროექტია. ფილმის საპრეზენტაციო პირველ კლიპში ჩანს, რომ სუინტონს ის კაბა აცვია, რომელიც ბალენსიაგას გასული წლის სექტემბერში გამოშვებულ კოლექციაში ვნახეთ.

იგივე მოდელი ეცვა ფიბი უოლერ ბრიჯს 2019 წლის ნოემბერში გამოსული Vogue-ის ფოტოსესიაში. კაბა დემნა გვასალიამ ბალენსიაგას გაზაფხული-ზაფხული 2020 წლის კოლექციაში პარიზის მოდის კვირეულზე წარადგინა.

ფოტო: El Deseo

ფოტო: Balenciaga

რაც შეეხება პედრო ალმოდოვარის ფილმს, მას მხოლოდ ორი პერსონაჟი ჰყავს — სუინტონი და ძაღლი. 70 წლის ესპანელი რეჟისორი კინოსურათს ცნობილი ფრანგი მწერლის, ჟან კოქტოს ერთმოქმედებიანი პიესის მიხედვით იღებს.

ფოტო: Venice Film Festival

ჟან კოტქტოს ამ ცნობილი პიესის სიუჟეტი თითქმის მთლიანად ქალის სატელეფონო საუბარზეა დაფუძნებული, რომელიც მოულოდნელად გაიგებს, რომ მისი დიდი ხნის საყვარელი სხვა ქალზე ქორწინდება.

ალმოდოვარს ამ პროექტზე მუშაობის დაწყება ჯერ კიდევ აპრილში უნდოდა, თუმცა პანდემიამ ხელი შეუშალა და მხოლოდ რამდენიმე თვის დაგვიანებით შეძლო ჩანაფიქრის განხორციელება.

ფილმის გადაღებების დაწყება პედროს ძმამ, აგუსტინ ალმოდოვარმა ფოტოთი დააანონსა, რომელშიც ვხედავთ, რომ გადაღებები შესაბამისი უსაფრთხოების ნორმების დაცვით მიმდინარეობს.

რაც მთავარია, ეს მისი ერთადერთი ინგლისურენოვანი ფილმი არ იქნება: ალმოდოვარმა ასევე დააანონსა, რომ ამერიკელი მწერლის, ლუსია ბერლინის მოთხრობების კრებულის A Manual for Cleaning Women მიხედვით სრულმეტრაჟიან ფილმს გადაიღებს.

ასევე ცოტა ხნის წინ გახდა ცნობილი, რომ ამ ლეგენდარულ რეჟისორს თავის კიდევ ერთ ფილმში პენელოპე კრუსის გადაღება სურს, რაც მისი შემოქმედების მოყვარულებს მომავალში მრავალფეროვან სანახაობას ჰპირდება.