განათლების მინისტრის მოადგილის, ნუნუ მიცკევიჩის განცხადებით, 19 ოქტომბრიდან თბილისის, ქუთაისის, ზუგდიდისა და ფოთის უმაღლესი სასწავლებლები, საუნივერსიტეტო სივრცეებში მხოლოდ პრაქტიკულ-ლაბორატორიულ სამუშაოებს განაახლებენ. მისი თქმით, უმაღლესი სასწავლებლები მათი უფლებამოსილების ფარგლებში, სასწავლო პროგრამების სხვა კომპონენტებს ისევ დისტანციურად წარმართავენ. აღნიშნული განცხადება სამინისტრომ დღეს გაავრცელა, ხვალიდან კი აუდიტორიებში სწავლის დაწყება იგეგმებოდა.

"აღსანიშნავია, რომ სასწავლო წლის დაწყებამდე, ჯერ კიდევ რამდენიმე თვით ადრე, დავიწყეთ მუშაობა ჯანდაცვის სამინისტროსთან ერთად უსაფრთხოების რეკომენდაციებზე. შესაბამისად, განსაზღვრულია და უნივერსიტეტების მხრიდან ზედმიწევნით არის დაცული ყველა სავალდებულოდ შესასრულებელი რეკომენდაცია — ეს არის, ერთმეტრიანი დისტანციის დაცვა მერხებს შორის, ყველა სააუდიტორიო სივრცეში სტუდენტის პირბადით გადაადგილება, სანიტაიზერების, დეზობარიერების გამოყენება, საუნივერსიტეტო სივრცეში შესვლისას თერმოსტრკრინინგი და ა.შ", — განაცხადა მინისტრის მოადგილემ.

მიცკევიჩის განმარტებით, ჯანდაცვის სამინისტროს შრომის ინსპექტირების დეპარტამენტმა ყველა უნივერსიტეტი სასწავლო წლის დასაწყისში გადაამოწმა და მათზე გაცემულია ნებართვა. ამიტომ, მისი განცხადებით, ყველა ის სივრცე, რომელიც სტუდენტებს 19 ოქტომბერს გახსნილი დახვდებათ, იქნება უსაფრთხო.