თუ ვის მისცა ხმა გენერალური დირექტორის არჩევისას, სამეურვეო საბჭოს თავმჯდომარე, გრიგოლ გოგელია არ ამხელს. თუმცა, On.ge-სთან საუბრისას ის ასახელებს კრიტერიუმებს, რისი მიხედვითაც გადაწყვეტილება მიიღო. მისი თქმით, ნებისმიერი ორგანიზაციის დირექტორი მართვის გამოცდილებით, კვალიფიკაციით, პროფესიონალიზმით, ბიოგრაფიითა და პიროვნული თვისებებით ირჩევა.

„არის სხვადასხვა პოლიტიკური როლები, როგორიც არის მოსამართლე, საზოგადოებრივი მაუწყებლის დირექტორი. ის [მოქალაქე] როდესაც შედის ამ როლში, თავისი პრეფერენციები უნდა შეინახოს თავისთვის და იმოქმედოს კანონის, სტანდარტების, პროტოკოლების შესაბამისად, რაც ინსტიტუტშიც არის და მის გარეთაც. თუ ის დაარღვევს ამ ნორმებს, კონტროლის ვალდებულება აქვს, ერთი მხრივ, სამეურვეო საბჭოს, სამოქალაქო საზოგადოებას - მეორე მხრივ, მათ შორის მედიასაც, დააფიქსიროს ეს დარღვევები. შესაბამისად, სამეურვეო საბჭოს ვალდებულებაა მიიღოს გადაწყვეტილება და შეუჩეროს გენერალურ დირექტორს უფლებამოსილება. ადამიანს შეურაცხყოფა არ უნდა მივაყენოთ იმიტომ, "რომ შენ პოლიტიკური პოზიცია გქონდა, ამიტომ შენ იქნები უკანონო ადამიანი... “ - განმარტავს გოგელია თავის პოზიციას.

კითხვაზე, იქონიებს თუ არა რაიმე გავლენას საზოგადოებრივი მაუწყებლის მიმართ ნდობაზე გენერალურ დირექტორად ვასილ მაღლაფერიძის არჩევა, როცა ის არ მალავს საკუთარ პოლიტიკურ სიმპათიებს და ამავე დროს, ის მუშაობდა ყოფილი პრემიერ-მინისტრის კუთვნილ ტელევიზიებში, გოგელია ასე პასუხობს:

„ის რა მედიასაშუალებებშიც არ უნდა ემუშავა კანდიდატს - რუსთავი 2, იმედი, მაესტრო, GDS - მას სრული უფლება აქვს, ემუშავა იმ მედიასაშუალებაში და იმ სტანდარტებით, როგორიც აქვს მაუწყებელს... იმან უბრალოდ, ჩვენთან რომ მოვა, თავისი ძველი სარედაქციო პოლიტიკა კი არ უნდა გაატაროს, უნდა გაატაროს, რომელიც შეესაბამება კანონმდებლობას, ქცევის კოდექსს, პროტოკოლს და ა.შ... ადამიანმა გასცა ამაზე პასუხი, მე არანაირი საფუძველი არ მაქვს, რომ არ უნდა ვენდო“.

საზოგადოებრივი მაუწყებლის გენერალური დირექტორის ასარჩევ კონკურსში მეორე კენჭისყრაზე ვასილ მაღლაფერიძემ 6 ხმა მიიღო, მისმა კონკურენტმა - თიკო ბერძენიშვილმა კი - 2. როგორც სამეურვეო საბჭოს წევრები - სულხან სალაძე და ქეთი მსხილაძე ამბობენ, მათ განმეორებით კენჭისყრაზე ბერძენიშვილს დაუჭირეს.