ტაქსის კომპანიამ - Taxify, მომსახურების საფასური 20 პროცენტით გაზარდა. მიზეზად კომპანია საწვავზე და ტრანსპორტთან დაკავშირებულ სხვა საქონელზე მომატებულ ფასებს ასახელებს:

"სამწუხაროდ, არსებული ფასებით ხარისხის შენარჩუნებას ვერ შევძლებთ" - განაცხადა ტაქსიფაიმ.

  • ECO კატეგორიაზე 10 თეთრით გაძვირდა ტარიფი და ერთი კილომეტრი 0,5 ლარიდან 0,6 ლარი გახდა.
  • ლოდინის ტარიფი კი წუთში 0,12 ლარამდე გაიზარდა, რაც მანამდე 0,1 ლარს შეადგენდა.

On.ge შეეცადა გაერკვია, სხვა ტაქსის კომპანიებმაც ხომ არ გაზარდეს ტარიფები, თუმცა ის კომპანიები, რომლებსაც ჩვენ დავუკავშირდით, ჯერ-ჯერობით ფასების ზრდას არ ადასტურებენ.

16 დეკემბერს, პარლამენტმა დაამტკიცა საკანონმდებლო ცვლილებების პაკეტი. პრემიერ მინისტრის მიერ შეთავაზებული რეფორმების შედეგად, 1-ლი იანვრიდან გაიზარდა მარცხენა და მარჯვენასაჭიანი ავტომობილებისა და საწვავის აქციზის გადასახადი, ხოლო ოჯახებს რომელთა წლიური შემოსავალი 100 000 ლარს აღემატება, ავტომობილზე ქონების გადასახადი დაუწესდათ.

საწვავმა გაძვირება 2016 წლის შემოდგომაზე დაიწყო და მას შემდეგ ეტაპობრივად ძვირდებოდა. გაძვირების ბოლო ტალღა 2017 წლის 3 იანვარს იყო. სექტემბრიდან დღემდე, ლიტრი საწვავის ღირებულება, საშუალოდ 30-40 თეთრით გაიზარდა.