3 იანვარს ბენზინგასამართი სადგურების ნაწილზე ბენზინი, დიზელი და გაზი კიდევ 15 თეთრით გაძვირდა.

მაგალითად, 25 დეკემბერს ბენზინი სუპერი ღირდა 2,19 ლარი, 3 იანვარს კი მისი ფასი 2,34 ლარია, პრემიუმი ძველი ფასი იყო 2,04 ლარი, ახალი ფასი - 2,14 ლარია, სხვა საწვავის მსგავსად 15 თეთრით გაძვირდა დიზელიც და მისი ღირებულება 3 იანვარს 2,03 ლარი. ზოგ ბენზინგასამართ სადგურზე 18 თეთრით, 1,45 ლარამდე გაიზარდა ავტომობილის გაზის ფასიც.

დეკემბერში ნავთობპროდუქტების იმპორტიორები აცხადებდნენ, რომ აქციზის გადასახადის დაანონსებულ ზრდამდე, საწვავზე ფასების მატება ლარის კურსის მერყეობით იყო გამოწვეული.

უკვე 1 იანვრიდან კი გაიზარდა აქციზის გადასახადი საწვავზე. ბენზინის შემთხვევაში აქციზის ღირებულება ერთ ტონაზე 250 ლარიდან 500 ლარამდე გაიზარდა; დიზელზე - 150-დან 400 ლარამდე; 1000 კუბურ მეტრ გაზზე - 80-დან 200 ლარამდე. ხოლო ავტომობილის ზეთებზე 400-დან 800 ლარამდე.

საქართველოში საწვავზე ფასის ზრდა 2016 წლის შემოდგომაზე დაიწყო და მას შემდეგ, საშუალოდ, 1 ლიტრზე 30-40 თეთრით გაიზარდა.