ევროპული საქართველოს საარჩევნო შტაბის ხელმძღვანელი, სერგი კაპანაძე, ვენეციის კომისიის ახალ დასკვნას ეხმაურება, სადაც საუბარია საერთო სასამართლოების შესახებ ორგანულ კანონში შესატან ცვლილებებზე.

კაპანაძის თქმით, კომისიამ დაადასტურა ის, რომ საქართველოს ხელისუფლება არ ითვალისწინებს საერთაშორიოს თანამეგობრობის მოსაზრებებს სასამართლო დამოუკიდებლობასთან დაკავშირებით.

"ვენეციის კომისიამ დაადასტურა ის, რასაც ჩვენ ვამბობდით მთელი ამ ხნის განმავლობაში, რომ ქართული ოცნება არ ითვალისწინებს საერთაშორისო თანამეგობრობის და ჩვენი მეგობრების მოსაზრებებს სასამართლო დამოუკიდებლობასთან დაკავშირებით", — ამბობს კაპანაძე.

კაპანაძის თქმით, პარლამენტის მიერ სწრაფად მიღებულმა კანონმა ბოლო ლურსმანი დააჭედა სასამართლოს კუბოზე.

"მათ ეხლა სწრაფად მიიღეს კანონი, რომლითაც კიდევ ერთხელ ბოლო ლურსმანი დააჭედეს სასამართლოს კუბოზე, იმ გაგებით, რომ ყველანაირი ტრანსპარენტულობის, გამჭირვალეობის და კრიტერიუმების გარეშე მისცეს საშუალება კლანს და ივანიშვილს, რომ მოსამართლეები დანიშნონ უზენაეს სასამართლოში.

ეს აუცილებლად შეიცვლება როგორც კი ივნიშვილი დამარცხდება და როცა გარდამტეხი ცვლილებები დაიწყება ამ ქვეყანაში. ერთ-ერთი პირველი რასაც ჩვენ, ევროპული საქართველო მივხედავთ, იქნება ის, რომ სასამართლო გახდეს დამოუკიდებელი, იყოს ნაფიცი მსაჯულები და უცხოელი მოსამართლეები, რათა ესეთი ტიპის დამოკიდებული, კონტროლირებული სასამართლო აღარასოდეს აღარ გვყავდეს", — განაცხადა კაპანაძემ.