სულ ახლახან, 8 ოქტომბერს ლიტერატურის დარგში 2020 წლის ნობელის ლაურეატი გამოვლინდა: ამერიკელი პოეტი ლუიზ გლუკი.

ამით ის მეთექვსმეტე ქალი ავტორი გახდა, ვინც ლიტერატურის დარგში ნობელის პრემიით დაჯილდოვდა.

77 წლის ლუიზ გლუკი ამერიკული პოეზიის ერთ-ერთი ყველაზე ცნობილი თანამედროვე წარმომადგენელია, რომელსაც დღემდე 14 პოეტური კრებული აქვს გამოცემული.

გლუკის ღვაწლის აღნიშვნისას, ნობელის კომიტეტის წარმომადგენელმა განაცხადა, რომ წლევანდელი ნობელი მას "განსაკუთრებული პოეტური ხმისთვის გადაეცა, რომელიც ღრმააზროვანი მშვენიერებით ინდივიდუალურ ყოფას საყოველთაოდ აქცევს".

ნობელის პრემიამდე ლუიზ გლუკი ასევე მრავალი სხვა საერთაშორისოდ ცნობილი ლიტერატურული ჯილდოს მფლობელი იყო, მათ შორისაა პულიცერის პრემიაც.

შეგახსენებთ, რომ გასულ წელს 2018-2019 წლების ნობელიანტი ავტორები ერთად დასახელდნენ: პოლონელი მწერალი ოლგა ტოკარჩუკი და ავსტრიელი პეტერ ჰანდკე.

ნობელის პრემია მსოფლიოში ერთ-ერთი ყველაზე გავლენიანი საერთაშორისო ჯილდოა, რომლის დაარსებაც შვედი ქიმიკოსის ალფრედ ნობელის სახელს უკავშირდება. პრემია 1901 წლიდან გაიცემა ქიმიის, ფიზიკის, ლიტერატურის, მშვიდობისა და ფიზიოლოგია/მედიცინის დარგში. პრემიის მფლობელებს 9 მილიონი შვედური კრონა გადაეცემათ, რაც დაახლოებით ერთ მილიონ დოლარს უდრის.

ლიტერატურის დარგში ნობელის პრემია წარსულში მიღებული აქვთ ისეთ ცნობილ ავტორებს, როგორებიც არიან ჰაინრიხ ბიოლი (1972), ჟოზე სარამაგუ (1998), მარიო ვარგას ლიოსა (2010) და სვეტლანა ალექსიევიჩი (2015).

ასევე იხილეთ: