რამდენიმე დღის წინ, ლელოს გამოვიდა ინიციატივით, გაზრდილიყო პანდემიის წინააღმდეგ ბრძოლაში აქტიურად ჩართული სამედიცინო პერსონალის ხელფასი. დღეს კი მთავრობის ადმინისტრაციაში გამართულ ბრიფინგზე ჯანდაცვის მინისტრმა, ეკატერინე ტიკარაძემ, სამედიცინო პერსონალის სახელფასო ანაზღაურების 50%-ის დანამატის სახით მიღებაზე ისაუბრა. როგორც ტიკარაძემ აღნიშნა, ექიმების გარდა, სახელფასო დანამატს სამედიცინო პერსონალის ყველა რგოლი მიიღებს. შესაბამისი ბრძანება დღეს გამოიცემა.

მინისტრის განცხადებას ვაკის მაჟორიტარი დეპუტატობის კანდიდატი და ლელოს ჯანდაცვის ჯგუფის წარმომადგენელი, ლევან კობერიძე გამოეხმაურა.

"5 დღის წინ ლელოს და ჯანდაცვის ჯგუფის მიერ გამართულ ბრიფინგზე მოვუწოდეთ მთავრობას, რომ მედპერსონალისთვის, ვინც არის კოვიდ 19-თან ბრძოლის წინა ხაზზე, მინიმუმ 1000 ლარიანი ერთჯერადი ბონუსი მიეცათ ბიუჯეტიდან და ამავდროულად, შეემუშავებინათ შედარებით გრძელვადიანი სამოტივაციო სქემაც. ძალიან გვიხარია, რომ მთავრობამ ყურად იღო ჩვენი რჩევა. იმედი გვაქვს, დროულად გასცემენ დაანონსებულ ფულად კომპენსაციებს სწორედ ბიუჯეტის ხარჯზე და ამ თანხის გაცემას კლინიკებს არ დაავალებენ. იმედის ვიტოვებ, რომ მხოლოდ სამთავრობო პიარისთვის არ გაკეთებულა ეს განცხადება და მთავრობა მართლა ზრუნავს ექიმებზე", — აცხადებს კობერიძე.

მისივე თქმით, ლელოს ჯანდაცვის ჯგუფი ყოველთვის იქნება ექიმების მედპერსონალის მხარდამჭერი და ყოველთვის მოუწოდებს მთავრობას პრევენციული ზომების მიღებას ჯანდაცვის სფეროში.

"ლელოს ყოველთვის ექნება საკმაოდ მწვავე და დროული რეაგირება, რათა გარკვეული საკითხები, რასაც ხელისფულება, თავისი პოლიტიკური დღის წესრიგიდან გამომდინარე ვერ ამჩნევს, ან არ უნდა რომ შეიმჩნიოს, გავხადოთ აქტუალური და ვაიძულოთ ისინი, რომ გადადგან სწორი ნაბიჯი", — განმარტა კობერიძემ.