საქართველოს პროკურატურის განცხადებით, სახელმწიფო საზღვრის დელიმიტაცია-დემარკაციის კომისიის ყოფილი წევრების ქმედებების შედეგად საქართველოს ტერიტორიის 3 500 ჰექტრის დაკარგვის საფრთხე გაჩნდა.

აზერბაიჯანთან საზღვრის შეთანხმების საქმეზე პროკურატურამ კომიის ყოფილი წევრები, ივერი მელაშვილი და ნატალია ილიჩოვა დააკავა. მათ ბრალად ედებათ საქართველოს საწინააღმდეგო მოქმედება, მიმართული უცხო ქვეყნისათვის საქართველოს მთელი ტერიტორიის ან მისი ნაწილის გადაცემისაკენ ანდა საქართველოს ტერიტორიიდან მისი ნაწილის გამოყოფისაკენ.

ორივე მათგანისთვის პროკურატურა პატიმრობის შეფარდებას მოითხოვს.

პროკურატურის ვერსიით, ტერიტორიის რა ნაწილს ექმნებოდათ დაკარგვის საფრთხე, უწყების ვიდეორგოლშია ჩამოთვლილი.

საბჭოთა კავშირის არსებობის პერიოდში, საქართველოსა და აზერბაიჯანის რესპუბლიკებს შორის ადმინისტრაციული საზღვრის ხაზი რამოდენიმეჯერ შეიცვალა და საბოლოოდ 1938 წელს ორმხრივად შეთანხმდა. კერძოდ, 1938 წლის მარტში, საქართველოს და აზერბაიჯანის უმაღლესმა მმართველობითმა ორგანოებმა დაამტკიცეს 1:500 000 მასშტაბის რუკაზე დატანილი ადმინისტრაციული საზღვრის ხაზი. 1996 წლის ივნისში, საქართველოს და აზერბაიჯანის სამთავრობო კომისიები ერთობლივ შეხვედრაზე შეთანხმდნენ, რომ სახელმწიფოებს შორის საზღვრის დადგენის საფუძველი იქნებოდა 1938 წელს მათ შორის ორმხრივად დამტკიცებული ადმინისტრაციული საზღვრის ხაზი.

ამ პროცესში ჩართულნი იყვნენ სამთავრობო კომისიის ერთ-ერთი წევრი და ექსპერტთა ჯგუფის ხელმძღვანელი, ივერი მელაშვილი და კომისიის ექსპერტ-კარტოგრაფი ნატალია ილიჩოვა.

როგორც პროკურატურაში ამბობენ, 2007 წლის ჩათვლით კომისიების მიერ სასაზღვრო ხაზის, დაახლოებით 303 კილომეტრის მონაკვეთი შეთანხმდა: ე.წ. წითელი ხიდის მიმდებარედ, ჯანდარის ტბის მიმდებარედ, ჯანდარის ტბის ჩრდილო-აღმოსავლეღით, ჩიჩხიტურის მიმდებარედ, დავით გარეჯის სამონასტრო კომპლექსის მიმდებარედ, იალაჯიხის ქედიდადნ მთა გეგტებემდე, მთა ალაჯიღის მიმდებარედ, მწვერვალი უჩბულაკიდან მწვერვალ ტახთაფამდე, მწვერვალ ვოსეგევამთის მიმდებარედ, მდინარე იორის გასწვრივ, მდინარე მლაშეწყალის გასწვრივ, ალაზნის კალაპოტის გასწვრივ, სოფელ ერისიმედის მიმდებარედ, მდინარე კვირიასწყალის გასწვრივ, მდინარე მაწიმისწყალის მიმდებარედ, მასიმისწყალის ხიდიდან მდინარის გასწვრივ.

ფოტო: პროკურატურა

პროკურატურის ბრალდებისა და ექსპერტიზების დასკვნის შესახებ დეტალურად წაიკითხეთ აქ.