დედაქალაქის მერის, კახა კალაძის განცხადებით, იპოდრომის მიმდებარედ არსებული კორტების ტერიტორია სახელმწიფომ დაიბრუნა და აცხადებს აუქციონს იქ ისევ სპორტული კომპლექსის მოწყობის მიზნით. ამის შესახებ ინფორმაცია მერმა თბილისის მთავრობის სხდომის წინ გამართულ ბრიფინგზე გააჟღერა.

"საზოგადოებას მოეხსენება, რომ ყოფილი იპოდრომის მიმდებარედ არსებული კორტების ტერიტორია 2009 წელს იქნა გასხვისებული, სადაც გარკვეული მშენებლობები უნდა განხორციელებულიყო საცხოვრებელი კორპუსების სახით, რაც წარმოადგენდა სერიოზულ პრობლემას ქალაქისთვის და ადგილობრივი მოსახლეობისთვის. ვაწარმოებდით მოლაპარაკებებს ინვესტორებთან, რომ აღნიშნული ტერიტორია დაბრუნებოდა მუნიციპალიტეტს, გაგვეკეთებინა ამ კონკრეტული მიწის ადგილმონაცვლეობა. ჩვენ წარმატებით დავასრულეთ მოლაპარაკება და განხორციელდა ადგილმონაცვლეობა და გვინდა, რომ ამ კონკრეტულ ადგილზე, კორტების ადგილზე აღვადგინოთ პირველადი სახე, სადაც ყველა ადამიანს ექნება შესაძლებლობა, ისარგებლონ ამ სპორტული კომპლექსით", — თქვა კალაძემ.

მერიამ ამ უკვე მუნიციპალიტეტის საკუთრებაში მყოფ ტერიტორიაზე გამოაცხადა აუქციონი იმასთან დაკავშირებით, რომ 2 მილიონი ლარის ინვესტიცია განხორციელდეს, გამარჯვებულმა კომპანიამ 7 174 მ2 ფართობზე 2 წლის ვადაში უნდა მოაწყოს 4 ღია საჩოგბურთო კორტი, 1 საცურაო აუზი და ერთი სავარჯიშო დარბაზი. ობიექტის პრივატიზაციის პირველადი, საწყისი თანხა შეადგენს 5 775 000 ლარს.