საქართველოს ახალგაზრდა იურისტთა ასოციაციაში აცხადებენ, რომ ლუკა სირაძის საქმეზე მსჯავრდებული მარიანა ჩოლიანის ადვოკატს საზოგადოება შეცდომაში შეჰყავს.

დღეს, 6 ოქტომბერს მედიაცენტრ მთავარში ადვოკატმა, გაგი მოსიაშვილმა განაცხადა, რომ გარდაცვალების დროს ლუკა სირაძე ნარკოტიკული თრობის ქვეშ იყო. საია-ში მიაჩნიათ, რომ ადვოკატი ცდილობს საზოგადოება დაარწმუნოს, რომ ლუკა სირაძის თვითმკვლელობა ნარკოტიკული ნივთიერების ზემოქმედებამ გამოიწვია, რაც სიმართლეს არ შეესაბამება.

7 სექტემბერს თბილისის საქალაქო სასამართლომ მარიანა ჩოლოიანის ჩვენების იძულებაში დამნაშავედ ცნო და მას 3 წლით თავისუფლების აღკვეთა მიუსაჯა. როგორც საია-ში ამბობენ, ამ დროისათვის სასამართლოში არ განიხილება ლუკა სირაძის თვითმკვლელობამდე მიყვანის ფაქტი, შესაბამისად, გარდაცვალების მიზეზსაც არ იკვლევს. მათივე თქმით, არასწორად ვრცელდება ინფორმაცია, რომ ლუკა სირაძე როგორც დედის, ასევე ძმის მხრიდან იყო აგრესიის მსხვერპლი.

საია-ში განმარტავენ, რომ გაგი მოსიაშვილის მიერ გავრცელებული ფაქტები არ ეყრდნობა საქმეში არსებულ მტკიცებულებებს და მასალებში ექსპერტიზის ორი დასკვნაა წარმოდგენილი.

"დასკვნების თანახმად, გარდაცვალების დღეს ლუკას ტანსაცმელსა და ფეხსაცმელზე არსებულ სისხლში, ასევე შემთხვევის ადგილის დათვალიერების დროს ასფალტის ზედაპირიდან ამოღებულ სისხლში არ აღმოჩნდა ნარკოტიკული საშუალებები და ფსიქოტროპული ნივთიერებები. მეორე ექსპერტიზის ფარგლებში ლუკას სისხლის ნიმუშის აღება მოხდა მისი სამედიცინო დაწესებულებაში ყოფნისას. დასკვნაში აღნიშნულია, რომ სისხლში აღმოჩნდა მხოლოდ ნარკოტიკული საშუალება მორფინი და ფსიქოტროპული ნივთიერებები დიაზეპამი და ნორდაზეპამი, რომლებიც მას სამედიცინო დანიშნულებით გაუკეთდა კლინიკაში მიყვანის შემდგომ. [...] ექსპერტიზის დასკვნით ასევე უარყოფითია პასუხი ალკოჰოლურ თრობასთან დაკავშირებით", — აღნიშნულია საია-ს განცხადებაში.

ორგანიზაციაში მიაჩნიათ, რომ მოსიაშვილი საზოგადოებაში ლუკა სირაძის და მისი ოჯახის მიმართ ნეგატიური განწყობის ფორმირებას და ამ გზით საკუთარი კლიენტის ინტერესების დაცვას ცდილობს. საია მიიჩნევს, რომ ადვოკატის მოქმედება ეწინააღმდეგება ადვოკატის ეთიკის ნორმებს.