საქართველოს საგარეო საქმეთა სამინისტრო გამოეხმაურა საფრანგეთის ოვერნ-რონა-ალპების რეგიონის პრეზიდენტის, ლორან ვოკიეს სოციალურ გვერდებზე გამოქვეყნებულ ფოტო-ვიდეო მასალას, სადაც ჩანს რუკა, რომელზეც საქართველოს ნაწილი სომხეთის საზღრებშია მოქცეული.

უწყების ოფიციალურ განცხადებაში ნათქვამია, რომ საფრანგეთში საქართველოს საელჩოს წარმომადგენლებთან ერთად დაუკავშირდნენ და ხაზზე არიან ფრანგ კოლეგებთან, კერძოდ საფრანგეთის ოვერნ-რონა-ალპების რეგიონის პრეზიდენტის ოფისთან. უწყების ცნობით, პირველადი მოკვლევით, ეს არის რუკა, რომელსაც აქტიურად იყენებს საფრანგეთში მოქმედი ნაციონალისტური ხასიათის ორგანიზაცია და მას არანაირი კავშირი ფრანგულ ოფიციალურ მხარესთან არ აქვს. განცხადებაშივე ნათქვამია, რომ აღნიშნული შენობა, სადაც იმყოფება რეგიონის პრეზიდენტი, ასევე, წარმოადგენს ნაციონალისტური ორგანიზაციის ოფისს.

უწყების ცნობას დართული აქვს საქართველოში საფრანგეთის ელჩის, დიეგო კოლას განცხადება, რომლითაც ელჩი ემიჯნება აღნიშნულ რუკას და აღნიშნავს, რომ ეს არ გამოხატავს ოფიციალური საფრანგეთი პოზიციას.