ევროპული საქართველოს წევრი, ირაკლი აბესაძე, საერთაშორისო გამჭირვალობა — საქართველოს კვლევას ეხმაურება, რომლის მიხედვითაც რეგიონებში, მუნიციპალიტეტების გამოცხადებულ ტენდერებში ხშირად ისეთი კომპანიები იგებენ, რომელთაც არ გააჩნიათ შესაბამისი კომპეტენცია.

აბესაძის თქმით, ეს არის ქართული ოცნების ღია ხელწერა, როდესაც საბიუჯეტო სახსრებიდან მილიონობით ლარი მიაქვთ იმ კომპანიებს, რომელთა ხელმძღავნელებიც დაკავშირებული არიან ხელისუფლებასთან.

აბესაძის თქმით, ამას ემატება ის ფაქტიც, რომ ყველა სამუშაო ტარდება უხარისხოდ და საჭირო ხდება სამუშაოების თავიდან ჩატარება.

"ქართული ოცნების ღია ხელწერაა, როდესაც საბიუჯეტო სახსრებიდან ასეულობით მილიონი ლარის ტენდერების მომგები კომპანიები არიან ხელისუფლების წარმომადგენლების ახლო ნათესავები და ოჯახის წევრები და მათთან სხვადასხვა კავშირში მყოფი პირები.

ეს არის ერთი მავნებლობა, რასაც ქართული ოცნება აკეთებს და უმატებს მეორეს, როდესაც ხშირ შემთხვევაში ეს პროექტები ხორციელდება უხარისხოდ ანუ საზოგადოება რჩება ორმაგად დაზარალებული. ერთი, რომ იფლანგება საბიუჯეტო სახსრები და იპარავენ ბიუჯეტის ფულს და მეორე — შესრულებული სამუშაოებიც არ რჩება საზოგადოებას, რომ შემდგომში გაუმჯობესებული ინფრასტრუქტურით მაინც ისარგებლონ. ეს არის სიტუაცია, რომელსაც სჭირდება გარდამტეხი ცვლილებები.

ამ შემთხვევაში, არ მგონია კახეთი იყოს გამონაკლისი, ძალიან ბევრ რეგიონში ვხვდებით, როდესაც საკრებულოს თავმჯდომარეების, მერების, დეპუტატების და მინისტრების ოჯახის წევრები არიან ტენდერების მომგებები. შეიძლება კახეთში ეს მომეტებულად არის და ღარიბაშვილის დროიდან "კახური კლანის" ინსტიტუტი ჩამოყალიბდა, თუმცა არც ერთი რეგიონი არ არის გამონაკლისი. სამწუხაროდ, ყველგან დაწესდა ბიუჯეტის ფლანგვის და სამუშაოს არშესრულების სტანდარტი", — განაცხადა აბესაძემ.