ამერიკის პრეზიდენტმა, დონალდ ტრამპმა უოლტერ რიდის სამხედრო ჰოსპიტალი, სადაც ის კორონავირუსის დიაგნოზით მკურნალობს, რამდენიმე წუთით დატოვა. იგი მანქანიდან იქ შეკრებილ მხარდამჭერებს მიესალმა და საავადმყოფოში დაბრუნდა.

ამას საზოგადოების მხრიდან კრიტიკა და სოციალურ ქსელებში გამოხმაურება მოჰყვა. საავადმყოფოს ექიმმა მისი ეს ქმედება უარყოფითად შეაფასა და აღნიშნა, რომ პრეზიდენტის საჯაროდ გამოჩენის სურვილს, არაერთი ადამიანის ჯანმრთელობის რისკის ქვეშ დაყენება შეუძლია.

"ყველა იმ ადამიანს, ვინც პრეზიდენტის ამ სრულიად არა საჭირო მგზავრობის დროს მანქანაში იმყოფებოდა, 14-დღიანი კარანტინის გავლა მოუწევს. ამ პოლიტიკური თეატრის გამო, ისინი შესაძლოა ავად გახდნენ, დაიღუპონ. ეს სიგიჟეა", — აღნიშნა მან.

2 ოქტომბერს ცნობილი გახდა, რომ ამერიკის პრეზიდენტსა და პირველ ლედის კორონავირუსი დაუდასტურდათ.

ტესტის დადებით პასუხამდე ერთი დღით ადრე დონალდ ტრამპმა მინესოტაში მიტინგი გამართა და ამომრჩეველს შეხვდა. როგორც სხვა ღონისძიებებზე, აქაც მას პირბადე არ ეკეთა.

COVID-19-ის პანდემიის დაწყების შემდეგ დემოკრატიული პარტიის წარმომადგენლები ტრამპს ხშირად ადანაშაულებენ იმის გამო, რომ მან შესაბამისი ზომები არ მიიღო, რასაც არაერთი სიცოცხლე შეეწირა. ამასთან, პრეზიდენტს აკრიტიკებდნენ იმის გამოც, რომ არ იცავდა სოციალურ დისტანციას და არ ატარებდა პირბადეს.