საქართველოს შინაგან საქმეთა სამინისტროს ინფორმაციით, ბოლნისში პოლიცია ნაციონალური მოძრაობის აქტივისტის დაკავების მიზნით მის სახლში მივიდა, თუმცა ოჯახის წევრებმა და ადგილობრივებმა ამის საშუალება არ მისცეს. უწყების ცნობით, აქტივისტის დაკავება ბოლნისში 27 სექტემბერს მომხდარი ინციდენტის გამო სურდათ.

"მოსამართლის განჩინებას საფუძვლად დაედო მიმდინარე წლის 27 სექტემბერს, ბოლნისის მუნიციპალიტეტის სოფელ ნახიდურში, ა.ი.-ს მიერ პარტია ქართული ოცნების აქტივისტების — გ.ა.-სა და ი.ა.-ს მიმართ განხორცილებული ძალადობა.

ადგილზე მისულ პოლიციელებს ა.ი.-ს ოჯახის წევრებმა და ადგილობრივმა მოსახლეობამ წინააღმდეგობა გაუწიეს და არ მისცეს მისი დაკავების საშუალება", — აცხადებენ უწყებაში.

მათივე ინფორმაციით, უკვე დაიწყო გამოძიება პოლიციის საქმიანობისთვის ხელის შეშლის მუხლით.

ენმ-ს აქტივისტს, ა.ი.-ს შსს ორი ან მეტი პირის მიმართ ჯგუფურად ჩადენილ ძალადობას ედავება.

27 სექტემბერს ბოლნისში ქართული ოცნებისა და ნაციონალური მოძრაობის წევრებს შორის დაპირისპირება მოხდა. ენმ-ს მხარდამჭერები და მათი მაჟორიტარობის კანდიდატი კახა ოქრიაშვილი ამტკიცებდნენ, რომ მათ ჩაიხანაში თავს დაესხნენ ოცნების მაჟორიტარობის კანდიდატის, გოგი მეშველიანის ძმა და მათი მხარდამჭერები. შეგახსენებთ, რომ წინა არჩევნებში ოქრიაშვილი ბოლნისში ქართული ოცნების კანდიდატი იყო.

მეშველიანმა On.ge-სთან ეს ინფორმაცია უარყო. მისი თქმით, თავად ინციდენტში არ მონაწილეობდა, რადგან ბოლნისში არ იყო და მისი ძმა არათუ ვინმეს სცემდა, არამედ აშველებდა.

საქმეზე გამოძიება სისხლის სამართლის კოდექსის 126-ე მუხლის პირველი პრიმა ნაწილის "ბ" ქვეპუნქტით მიმდინარეობს, რაც ჯგუფურ ძალადობას გულისხმობს.

აღსანიშნავია, რომ დღეს, 3 ოქტომბერს მარნეულში 29 სექტემბერს მომხდარი დაპირისპირების საქმეზე ჯგუფური ძალადობის ბრალდებით ორი ადამიანი დააკავეს. ტელეკომპანია ფორმულას ინფორმაციით, დაკავებულები ქართული ოცნების აქტივისტი და მარნეულის მერიის თანამშრომლები არიან. თუმცა ამის შესახებ "არაფერი იციან" მარნეულის მერის მოვალეობის შემსრულებელმა, მისმა თანაშემწემ და მერიის ადმინისტრაციის უფროსმა, პრესსამსახურში კი ამ ინფორმაციის გარკვევას დაახლოებით ერთი საათია ცდილობენ. რაც შეეხება ქართული ოცნების აქტივისტს, On.ge პარტიის პრესსამსახურსაც დაუკავშირდა და პასუხს ამ დრომდე ელოდება.