მარნეულში 29 სექტემბერს მომხდარი დაპირისპირების საქმეზე ჯგუფური ძალადობის ბრალდებით ორი ადამიანი დააკავეს. ტელეკომპანია ფორმულას ინფორმაციით, დაკავებულები ქართული ოცნების აქტივისტი და მარნეულის მერიის თანამშრომლები არიან. თუმცა ამის შესახებ "არაფერი იციან" მარნეულის მერის მოვალეობის შემსრულებელმა, მისმა თანაშემწემ და მერიის ადმინისტრაციის უფროსმა, პრესსამსახურში კი ამ ინფორმაციის გარკვევას დაახლოებით ერთი საათია ცდილობენ. რაც შეეხება ქართული ოცნების აქტივისტს, On.ge პარტიის პრესსამსახურსაც დაუკავშირდა და პასუხს ამ დრომდე ელოდება.

შინაგან საქმეთა სამინისტროს გავრცელებულ განცხადებაში არ დაუკონკრეტებია, არიან თუ არა დაკავებულები ქართული ოცნების აქტივისტი და მარნეულის მერიის თანამშრომელი. უწყებაში ამბობენ მხოლოდ იმას, რომ ისინი ძალადობის ბრალდებით, მოსამართლის განჩინების საფუძველზე დააკავეს.

"გამოძიებით დადგინდა, რომ გ.შ.-მ მიმდინარე წლის 29 სექტემბერს, საღამოს, მარნეულში, რუსთაველის ქუჩაზე, სიტყვიერი და ფიზიკური შეურაცხყოფა მიაყენა ნაციონალური მოძრაობის აქტივისტებს — გ.ქ.-სა და ლ.ქ.-ს, ასევე, მათ თანმხლებს — დ.ქ.-ს. რაც შეეხება მეორე ბრალდებულს — გ.ჯ.-ს, გამოძიებით დადგენილია, რომ მან ამავე დაპირისპირებისას ასევე ფიზიკური შეურაცხყოფა მიაყენა გ.ქ.-ს", — აღნიშნულია შსს-ს განცხადებაში.

გამოძიება საქართველოს სისხლის სამართლის კოდექსის 126-ე მუხლის 1-ლი პრიმა ნაწილით მიმდინარეობს, რაც ჯგუფურად ჩადენილ ძალადობას გულისხმობს.