ბელარუსის საგარეო საქმეთა სამინისტრომ ყველა უცხოელ ჟურნალისტს, რომელიც ქვეყანაში მუშაობს, აკრედიტაცია გააუქმა. ამის შესახებ სამინისტროს განცხადებაშია საუბარი.

როგორც უწყებაში აცხადებენ, ამის მიზეზი უცხოელი ჟურნალისტებისთვის აკრედიტაციების მიღების ახალი წესის შემუშავებაა. აქამდე პორტალი Tut.by ავრცელებდა ინფორმაციას, რომ აკრედიტაცია გააუქმეს რადიო თავისუფლების, Current Times, BBC-ის, Reuters-ის, Associated Press და ARD-ის ჟურნალისტებს.

ამასთან ბელარუსის ინფორმაციის სამინისტრომ Tut.By-ს მედიის სტატუსი სამი თვით შეუჩერა.

ბელარუსში მასობრივი აქციები კვლავ გრძელდება და 9 აგვისტოს საპრეზიდენტო არჩევნების შედეგებს აპროტესტებენ. დემონსტრანტები პრეზიდენტ ალექსანდრ ლუკაშენკოს გადადგომასა და ხელახალი არჩევნების ჩატარებას მოითხოვენ. აქციების ჩახშობის დროს ოთხი ადამიანი გარდაიცვალა, ხოლო ექვსი უგზო-უკვლოდ დაკარგულად მიიჩნევა. დაშავებულთა და დაკავებულთა ზუსტი რიცხვი უცნობია.