დემოკრატიული პარტიის საპრეზიდენტო კანდიდატი და ყოფილი ვიცე-პრეზიდენტი, ჯო ბაიდენი პრეზიდენტ დონალდ ტრამპმსა და პირველ ლედის გამოჯანმრთელებას ვუსურვებ.

"ჯილი და მე პრეზიდენტ ტრამპსა და პირველ ლედის, მელანია ტრამპს სწრაფ გამოჯანმრთელებას ვუსურვებთ. ჩვენ გავაგრძელებთ ლოცვას პრეზიდენტისა და მისი ოჯახის ჯანმრთელობისთვისა და უსაფრთხოებისთვის", — წერს ბაიდენი ტვიტერზე.

აშშ-ს პრეზიდენტსა და პირველ ლედის კორონავირუსი დაუდასტურდათ. მანამდე ტესტზე დადებითი პასუხი ჰქონდა დონალდ ტრამპის მრჩეველს, 31 წლის ჰოუპ ჰიკს. იგი ოჰაიოში 29 სექტემბერს საპრეზიდენტო დებატებზე პრეზიდენტთან ერთად გაემგზავრა. მრჩევლის ინფიცირების შემდეგ პრეზიდენტი და პირველი ლედი კარანტინში გადავიდნენ და ტესტის პასუხებს ელოდნენ.

COVID-19-ის პანდემიის დაწყების შემდეგ დემოკრატიული პარტიის წარმომადგენლები ტრამპს ხშირად ადანაშაულებენ იმის გამო, რომ მან შესაბამისი ზომები არ მიიღო, რასაც არაერთი სიცოცხლე შეეწირა. ამასთან, პრეზიდენტს აკრიტიკებდნენ იმის გამოც, რომ არ იცავდა სოციალურ დისტანციას და არ ატარებდა პირბადეს.

ტესტის დადებით პასუხამდე ერთი დღით ადრე დონალდ ტრამპმა მინესოტაში მიტინგი გამართა და ამომრჩეველს შეხვდა. როგორც სხვა ღონისძიებებზე, აქაც მას პირბადე არ ეკეთა.