QAnon-ის შეთქმულების თეორიის ავტორები და მიმდევრები მოდელ კრისი ტეიგენს ონლაინ ესხმიან თავს. ტეიგენმა გუშინ ემოციური პოსტი გამოაქვეყნა ორსულობის შეწყვეტაზე და შვილის დაკარგვაზე, რასაც სოციალურ მედიაში მის მიმართ მხარდაჭერა მოჰყვა. თუმცა, ონლაინ პლატფორმის ის მომხმარებლები, რომლებიც დეზინფორმაციას ავრცელებენ, ტეიგენს საჯაროდ უყენებენ უსაფუძვლო ბრალდებებს და ამცირებენ.

QAnon-ის მიმდევრები ცნობილ მოდელს პედოფილიასა და ბავშვების ჭამაში ადანაშაულებენ. კრისი ტეიგენი დიდი ხანია, რაც შეთქმულების თეორეტიკოსების სამიზნეა. მათი თავდასხმის გამო, ანტერპრენერმა წელს თავის ტვიტებზე წვდომა დროებით შეზღუდა კიდეც. ონლაინ პლატფორმებს, როგორიცაა ფეისბუქი, ტვიტერი და ინსტაგრამი, მათი გაკონტროლება უჭირთ.

კომენტარებს, როგორიცაა "ეს კარმაა, იმის გამო, რომ ბავშვებს ჭამ", ათასობით ლაიქი აქვს.

ამასთან ერთად, ფეისბუქზე დარეგისტრირებული ანგარიშებით QAnon-ის მიმდევრები ტეიგენზე ინფორმაციას საკუთარ გვერდზე პოსტავდნენ და ტეიგენს პედოფილიაში ადანაშაულებდნენ. ისინი იყენებდნენ ჰეშტეგს #SaveOurChildren (გადავარჩინოთ ჩვენი ბავშვები).

ტვიტერი აცხადებს, რომ ცდილობს დროულად წაშალოს ანგარიშები, რომლებიც კოორდინირებულად ავრცელებენ დეზინფორმაციას და პლატფორმაზე საფრთხისშემცველ აქტივობებს ახორციელებენ. ფეისბუქი კი ასევე ამბობს, რომ ცდილობს წაშალოს ის ანგარიშები, რომლებიც წესებს არღვევენ, თუმცა ტეიგენის პოსტებზე მათი კომენტარები ჯერ კიდევ არის.

QAnon შეთქმულების თეორიის მომხრეთა ულტრამემარჯვენე ჯგუფია. მათ სწამთ, რომ ამერიკას მართავს სატანის მოთაყვანე ჯგუფი, რომელიც თავში უდგას ბავშვების სექს-ტრეფიკინგის კულტს. ისინი ამტკიცებენ, რომ ეს ჯგუფი დონალდ ტრამპს ებრძვის და პრეზიდენტობის დღიდან, ტრამპს მათთან გამკლავება უწევს. ამ თეორიების არც-ერთი პუნქტი ფაქტზე დამყარებული არაა.

შეთქმულების თეორეტიკოსები თავიანთი მტრებს პედოფილიაში და ბავშვების ჭამაში მე-12 საუკუნიდან ადანაშაულებენ, როდესაც ანტისემიტური შეთქმულების თეორიების ავტორები იტყუებოდნენ, რომ ებრაელები ქრისტიან ბავშვებს კლავდნენ და მათ სისხლს მთელ მსოფლიოში იყენებდნენ.

ამავე თემაზე: