რუსი ოპოზიციონერი ალექსეი ნავალნი გერმანულ ჟურნალ Der Spiegel-თან ამბობს, რომ მისი მოწამვლის უკან რუსეთის პრეზიდენტი ვლადიმირ პუტინი დგას. როგორც იგი ამბობს, მას არ ეშინია. ჯერ ინტერვიუს მხოლოდ ნაწილია გამოქვეყნებული და სრული ინტერვიუ მოგვიანებით იქნება ხელმისაწვდომი.

"მე ვამტკიცებ, რომ ამ დანაშაულის უკან დგას პუტინი და მომხდარის სხვა ვერსია არ მაქვს", — თქვა ნავალნიმ. მისივე თქმით, გამოჯანმრთელების შემდეგ ისევ რუსეთში დაბრუნებას აპირებს:

"ჩემი ამოცანაა უშიშარად ვიყო. არ მეშინია".

ამასთან, მან აღწერა ის მომენტი, როცა პირველად შეუძლოდ გახდა.

"თქვენ ვერ გრძნობთ ტკივილს, მაგრამ იცით, რომ კვდებით", — აღნიშნა მან.

20 აგვისტოს ალექსეი ნავალნი თვითმფრინავში შეუძლოდ გახდა, რის შემდეგაც ის ომსკის საავადმყოფოში გადაიყვანეს. ორი დღის შემდეგ ოჯახის მოთხოვნით, ოპოზიციონერი ბერლინის კლინიკა შარიტეში წაიყვანეს. გერმანელი ექიმები მივიდნენ დასკვნამდე, რომ ნავალნი ნოვიჩოკის ჯგუფის ნივთიერებით მოწამლეს. იგივე ვერსია საფრანგეთისა და შვეიცარიის ლაბორატორიებმა დაადასტურეს.

რუსეთის ხელისუფლება აცხადებს, რომ მომხდართან კავშირი არ აქვთ, ნავალნის მოწამვლის ვერსიას უარყოფენ და გერმანიისგან უფრო მეტი ინფორმაციის მიწოდებას მოითხოვენ.