სომეხი ჰაკერების განცხადებით, აზერბაიჯანის თავდაცვის სამინისტროს ვებგვერდი გატეხეს. ამ წუთებში უწყების საიტი მიუწვდომელია, თუმცა, აღსანიშნია, რომ საომარი მოქმედებების დაწყების დღიდან ის გაუმართავად მუშაობდა და ხშირად არ იტვირთებოდა.

როგორც სომხური გამოცემები წერენ, კიბერარმიის, "მონტე მელკონიანის" წევრებმა განცხადება გაავრცელეს და აზერბაიჯანს მოუწოდეს "ელოდნენ მათ, რადგან გაგრძელება იქნება" და სხვა სამთავრობო ვებგვერდებსაც დაჰაკავენ.

სომეხი ჰაკერების კიბერთავდასხმას წინ უძღოდა, სავარაუდოდ, აზერბაიჯანელი ჰაკერების თავდასხმა სომხური მედიების ვებგვერდებზე, სადაც რამდენიმე წუთით მთავარ გვერდზე ილჰამ ალიევის ვიდეო გამოჩნდა.

ბოლო მონაცემებით, დაპირისპირებულ მხარეებს ყავთ ათეულობით გარდაცვლილი, როგორც სამოქალაქო, ასევე, სამხედროებს შორის. აზერბაიჯანი-სომხეთის საზღვარზე შეტაკებები მთელი ღამის განმავლობაში გაგრძელდა. ორივე მხარე შეტაკებებისა და ერთმანეთის ტექნიკის განადგურების ვიდეო და ფოტომასალას აქვეყნებს.

აზერბაიჯანის თავდაცვის სამინისტროს განცხადებით, 29 სექტემბრის ღამეს სომხეთი კონტრშეტევებით დაკარგული ტერიტორიების დაბრუნებას ცდილობდა, თუმცა მათ ეს მცდელობები აღკვეთეს. ამასთან, აზერბაიჯანული მხარე აცხადებს, ქალაქ ფიზულის მიმართულებით შეტევას აგრძელებენ.

ბაქოში ამბობენ, რომ სომეხმა სამხედროებმა ვარდენისის რაიონიდან აზერბაიჯანის დაშქესანის რაიონის მიმართულებით საარტილერიო თავდასხმა განახორციელეს. აღნიშნული ინფორმაცია ერევანმა უარყო. მათივე თქმით, თავდასხმისას კიდევ ოთხი სომხური ტანკი გაანადგურეს.

ღამის პირველი საათისთვის თვითაღიარებული რესპუბლიკა არცახის (ყარაბაღი) თავდაცვის სამინისტრომ დაღუპულების შესახებ ინფორმაცია გამოაქვეყნა. როგორც ისინი აცხადებენ, ორშაბათს მათ კიდევ 26 სამხედრო დაკარგეს — სულ 84.

27 სექტემბერს მთიან ყარაბაღში სამხედრო დაპირისპირება განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

გაიგეთ მეტი: