ორსაათიანი მოლაპარაკებების შემდეგ ნინოწმინდაში, საქართველო-სომხეთის საზღვართან შეკრებილ მოქალაქეებს სურსათის სომხეთში გადატანის ნება დართეს. ამის შესახებ ინფორმაციას ადგილობრივი მედია გამოცემა, სამხრეთის კარიბჭე ავრცელებს.

როგორც გამოცემა წერს, საზღვართან ხმაური და ხალხმრავლობა იმან გამოიწვია, რომ ადგილობრივებს არ აძლევდნენ უფლებას შეგროვებული ნივთები სომხეთში გადაეტანათ. კერძოდ, მოქალაქეებმა ნინოწმინდასა და ახალქალაქში სურსათი და საბურავები შეაგროვეს, რომლის გადატანაც სომხეთში, შემდეგ კი, სავარაუდოდ, ყარაბაღში სურდათ. საზღვართან იყო სიტყვიერი დაპირისპირებაც, ადგილზე მობილიზებული იყო პოლიცია. გამოცემის ინფორმაციით, ამ დროისათვის მათთვის გადაადგილება თავისუფალია.

ადგილობრივები სამხრეთის კარიბჭესთან აცხადებენ, რომ ამ ეტაპისთვის მათ საბურავების გადატანის ნებას არ რთავენ.

"ოთხი ტრაილერი გვყავდა საბურავებით დატვირთული და უკან გააბრუნეს, ხვალიდან დავიწყებთ მოლაპარაკებებს, რომ სურსათის მსგავსად მათი გატანის უფლება მოგვცენ", — აცხადებენ ადგილობრივები.

ჯემნიუსის ვიდეო — მოქალაქეების საზღვარზე გადასვლის უფლებას ითხოვენ.

28 სექტემბერს ახალქალაქსა და ნინოწმინდაში მთელი დღის განმავლობაში აგროვებდნენ სურსათს, ტანსაცმელს, მედიკამენტებსა და საბურავებს. სამხრეთის კარიბჭის ინფორმაციით, სომხეთის დასახმარებლად ახალგაზრდები მოხალისეთა სიაშიც ჩაეწერნენ.

27 სექტემბერს მთიან ყარაბაღში სამხედრო დაპირისპირება განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

გაიგეთ მეტი: