ევროპული საქართველოს ლიდერი, დავით ბაქრაძე, პარტიის მაჟორიტარი დეპუტატობის კანდიდატთან სამტრედიის, წყალტუბოს, ვანისა და ხონის ოლქში, აკაკი ბობოხიძესთან ერთად, წყალტუბოს მოსახლეობას შეხვდა და მათ პარტიის პროგრამა გააცნო.

"წყალტუბო არის ერთ-ერთი მაგალითი გაშვებული შესაძლებლობების და იმის, თუ სადამდე მიიყვანა ქართულმა ოცნებამ ქვეყანა. მიუხედედავად არაერთი დაპირებისა, მიუხედავად ივანიშვილის პირადი დაპირებისა, წყალტუბოს რაიონში დღეს არის უზარმაზარი პრობლემები, არც ინფასტრუქტურაა აღდგენილი, ვერც ტურიზმი მუშაობს, ადამიანებს არ აქვთ შესაძლებლობა გაიტანონ და გაყიდონ უცხოეთში საკუთარი შრომით მოწეული მწვანილი და ეს არის ის რაიონი, რომელიც არამარტო თავის თავს ირჩენს, არამედ, საქართველოს ბიუჯეტში შეუძლია უზარმაზარი თანხები შეიტანოს.

სწორედ ამიტომ, 31 ოქტომბერი უნდა იყოს გარდამტეხი ცვლილებების არჩევნები, ჩვენ წყალტუბოელებს ვთავაზობთ სატვირთო ტერმინალს კოპიტნარის აეროპორტში, რომელიც პირდაპირ მოემსახურება ამ ადამიანების პროდუქციის გატანას ევროპაში, ჩვენ წყალტუბოელებს ვთავაზობთ ინფრასტრუქტურის აღდგენას და ტურისტული ინფრასტრუქტურის ისე ჩამოყალიბებას, რომ წელიწადში, იმერეთში, მინიმუმ ჩამოდიოდეს მილიონი ევროპელი ტურისტი, ჩვენ წყალტუბოელებს ვთავაზობთ ყველა იმ ცვლილებას, რომელიც ქვეყანას წაიყვანს წინ", — განაცხადა დავით ბაქრაძემ.

ამიტომ, სწორედ ეს არის 31 ოქტომბრის არჩევნები, ან ქვეყანა დარჩება უკუსვლაში, ჭაობში და უიმედობაში, ან ყველა ერთად მოვიტანთ გარდამტეხ ცვლილებებს და ქვეყანას წავიყვანთ წინ.“ - განაცხადა დავით ბაქრაძემ.

აკაკი ბობოხიძის თქმით, ის უკიდურესი გაჭირვება, რომელიც ამ რეგიონშია, უნდა დასრულდეს 31 ოქტომბერს, გარდამტეხი ცვლილებების მოტანით.

"ჩვენ გვაქვს მორიგი შეხვედრა საარჩევნო კამპანიის ფარგლებში, ვხვდებით წყალტუბოელ ამომრჩევლებს და მათთან ერთად ვაპირებთ გავიმარჯვოთ 31 ოქტომბრის არჩევნებში, რათა მშვიდობიანად, არჩევნების გზით დავასრულოთ ბიძინა ივაბნიშვილის ხელისუფლება და საქართველო მოვამზადოთ გარდამტეხი ცვლილებებისათვის, ქვეყანას სჭირდება ცვლილებები და წინსვლა", — განაცხადა აკაკი ბობოხიძემ.