საქართველოს საბანკო ასოციაციის განცხადებით, ყველა ბანკი ტრანზაქციების შესახებ ინფორმაციას ფინანსური მონიტორინგის სამსახურს აწვდის, მონიტორიგი და ანგარიშგება კი კანონმდებლობისა და რეგულაციებით გათვალისწინებული წესების სრული დაცვით ხორციელდება. ასე გამოეხმაურნენ საბანკო ასპოციაციის წარმომადგენლები საგამოძიებო ჟურნალისტების საერთაშორისო კონსორციუმის (ICIJ) მიერ გამოქვეყნებულ დოკუმენტებს, რომელიც აჩვენებს, თუ როგორ მიმდინარეობდა გადარიცხვები მსოფლიოს უმსხვილეს ბანკებს შორის. მათი განცხადებით, ეს გადარიცხვები ფულის გათეთრების ეჭვებს აჩენს და მათ შორის სამი ქართული ბანკიც მოხვდა. დოკუმენტების მიხედვით, TBC-დან, საქართველოს ბანკიდან და პროკრედიტ ბანკიდან, საეჭვო მიზნით, არაერთი მსხვილი ტრანზაქცია განხორციელდა.

საბანკო ასოციაციაში განმარტავენ, რომ საბანკო სფეროს საქმიანობას მკაცრი შიდა და საერთაშორისო კანონმდებლობა განსაზღვრავს, რომელიც ბანკების მხრიდან ყველა ქმედებას, მათ შორის, ტრანზაქციების განხორციელებასაც არეგულირებს.

"ICIJ-ის ანგარიშში, რომელშიც გამოყენებულია ბანკების მიერ მონიტორინგის სამსახურისთვის მიწოდებული ინფორმაცია, საუბარია 2007-2016 წლებში განხორციელებულ ტრანზაქციებზე, რომელთა მთლიანი მოცულობიდან საქართველოზე 0.08 პროცენტი მოდის. საყურადღებოა, რომ ICIJ-ის ანგარიშშივე აღნიშნულია, რომ ეს გადარიცხვები შესაბამისი სამართლებრივი მოკვლევის გარეშე ვერ ჩაითვლება დარღვევად. კლიენტის კონფიდენციალობის დაცვის ვალდებულებიდან გამომდინარე, ბანკები ვერ გაასაჯაროვებენ აღნიშნული ტრანზაქციების დეტალებს", — აცხადებენ ასოციაციაში.

მათივე თქმით, ასოციაციის წევრი ბანკები კანონმდებლობით დადგენილი ნორმების თანახმად მოქმედებენ და თანამშრომლობისთვის მზად არიან.

ჩანაწერებში შედის 2 100-ზე მეტი საეჭვო საქმიანობის ანგარიში, რომლებიც შეიტანეს ამერიკის შეერთებულ შტატებში ფინანსური დანაშაულის აღსრულების ქსელში — FinCEN. დოკუმენტები თავდაპირველად BuzzFeed News-მა გაუზიარა ICIJ-ს (საგამოძიებო ჟურნალისტების საერთაშორისო კონსორციუმს) და 108 მედიაპარტნიორს 88 ქვეყანაში.

საიტზე ნაჩვენებია ასევე ტრანზაქციების რუკა, რომელშიც მოცემულია ინფორმაცია 2000-2017 წლებში 2 ტრილიონის ოდენობის თანხის ტრანზაქციებზე, რომლებიც ფინანსური ინსტიტუტების მიერ საეჭვოდ შეფასდა.