პროკურორ დავით გუმბერიძის თქმით, მიხეილ რამიშვილს მობილური ტელეფონი დაილუქა მისივე ნებართვით. პროკურორის თქმით, ადვოკატის ტელეფონში ინახება გამოძიებისთვის მნიშვნელოვანი დეტალები.

"დღეს თბილისის საქალაქო სასამართლოს განჩინების საფუძველზე ჩატარდა მიხეილ რამიშვილის კუთვნილი ტელეფონიდან ინფორმაციის გამოთხოვა. რამიშვილის ტელეფონში აღმოჩნდა საკმაოდ მნიშვნელოვანი ინფორმაცია, როგორც ფურცხვანიძის კომუნიკაციის ნაწილში, ასევე რამოდენიმე სატელიტის ფოტოებთან დაკავშირებით. გამომდინარე იქიდან, რომ ინფორმაცია, რომელიც ფიქსირდება მიხეილ რამიშვილის ტელეფონში, საქმისათვის საკმაოდ მნიშვნელოვან გარემოებას წარმოადგენს, ჩვენ მიხეილ რამიშვილს შევთავაზეთ უშუალოდ ექსპერტის მონაწილეობით მომხდარიყო ამ კონკრეტული ინფორმაციის ტელეფონიდან გადმოტანა და საქმეზე დამაგრება. შესაბამისად მისი თანხმობით მოხდა ამ ტელეფონის დალუქვა", — განაცხადა დავით გუმბერიძემ.

დღეს პროკურატურაში თამარ ბაჩალიაშვილის ოჯახის ადვოკატს, მიხეილ რამიშვილის მობილური ტელეფონი ჩამოართვეს.