ამერიკის პრეზიდენტის, დონალდ ტრამპის განცხადებით, იგი პირობას დებს, რომ უზენაეს სასამართლოში რუთ გინსბურგის შემცვლელად, ქალ კანდიდატს წარადგენს. ამის შესახებ ინფორმაციას BBC ავრცელებს.

"მე მომავალ კვირას დავასახელებ კანდიდატს და ეს იქნება ქალი. ჩემი აზრით, ეს ქალი უნდა იყოს, რადგან, რეალურად, მე ქალები ბევრად უფრო მომწონს, ვიდრე კაცები", — განაცხადა ტრამპა.

ახალი მოსამართლის არჩევა მას შემდეგ გახდა საჭირო, რაც აშშ-ს უზენაესი სასამართლოს უხუცესი მოსამართლე, რუთ გინსბურგი 87 წლის ასაკში გარდაიცვალა. იგი ერთ-ერთ ლიბერალ მოსამართლედ ითვლებოდა, რომელიც ქალთა უფლებებისთვის იბრძოდა.

აშშ-ში უზენაესი სასამართლოს მოსამართლეებად სიცოცხლის ბოლომდე ინიშნებიან. მათ კანდიდატურას კი სენატს პრეზიდენტი წარუდგენს. თავისი პრეზიდენტობის განმავლობაში ტრამპმა უზენაესი სასამართლოს ორი მოსამართლე წარადგინა და მიიჩნევა, რომ ამით კონსერვატიული ფრთა გაძლიერდა.

დემოკრატიული პარტიის კანდიდატმა ჯო ბაიდენმა განაცხადა, რომ უზენაესი სასამართლოს მოსამართლეობის კანდიდატი არჩევნების შემდეგ უნდა წარადგინონ, თუმცა ტრამპი ფიქრობს, რომ მოსამართლე დაუყოვნებლივ უნდა აირჩიონ.