თიანეთის მერისა და ქართული ოცნების ყოფილი წევრის, თამაზ მეჭიაურის თქმით, მას აშანტაჟებდნენ. კერძოდ, გადადგომის შემდეგ მისგან სასურველი პიროვნების დანიშვნას მოითხოვდნენ, წინააღმდეგ შემთხვევაში კი მაკომპრომიტირებელი მასალების გასაჯაროებით დაემუქრნენ. ამის შესახებ მან მთავარი არხის ეთერში ისაუბრა.

ამასთან, მეჭიაურს არ დაუკავშირებია ეს შემთხვევა მისი მძღოლის თვითმკვლელობის მცდელობასთან. თიანეთის მერის 22 წლის მძღოლის დედა აცხადებს, რომ მის შვილზე მმართველი გუნდის წარმომადგენლები ზეწოლას ახდენდნენ და მეჭიაურზე ინფორმაციის მოპოვებას მოითხოვდნენ. როგორც დედა ამბობს, მან ზეწოლას ვერ გაუძლო, რის გამოც თვითმკვლელობა სცადა.

თიანეთის მერი მძღოლის შემთხვევაში პოლიტიკურ სარჩულზე არ საუბრობს და აღნიშნავს, რომ ზეწოლა დედის ვერსიაა. იგი იმედოვნებს, რომ მისი მძღოლი, რომელიც ახლა კრიტიკულ მდგომარეობაშია, თავად მოყვება მომხდარის შესახებ. იგი, ასევე, აღნიშნავს, რომ გამოძიებას ენდობა.

რაც შეეხება მის საქმეს, მეჭიაურს არ უთქვამს, ვინ იყო მასთან მისული ან ვინ ემუქრებოდა. მან, ასევე, აღნიშნა, რომ ესენი იყვნენ რეგიონის მაღალი თანამდებობის პირების, მათ შორის გუბერნატორისა და ქართული ოცნების მაჟორიტარი კანდიდატის გარემოცვა.

"თუმცა ჩემს მიმართაც ჰქონდა შანტაჟს ადგილი, თუ არ დავნიშნავდი მათთვის მისაღებ პიროვნებას ჩემს შემცვლელად, მას შემდეგ რაც მე გადავდგებოდი და კენჭს ვიყრიდი, ისინი გამომიქვეყნებდნენ რაღაც მაკომპრომეტირებელ მასალებს, რასაც მე შევხვდი შედარებით მშვიდად და ვუთხარი გამოექვეყნებინათ", — აღნიშნა მეჭიაურმა.

მისივე თქმით, ამჟამად თიანეთის რეგიონში ძალადობრივ პროცესებს მართავენ ნაიცონალური მოძრაობის ყოფილი წევრები, რომლებიც ახლა ქართულ ოცნებაში არიან.