რუსი ოპოზიციონერი ალექსეი ნავალნი, რომელიც მოწამლეს და ახლა გერმანიის კლინიკაში მკურნალობას გადის ინსტაგრამზე პოსტს აქვეყნებს და თავისი რეაბილიტაციის დეტალებზე ყვება. მას უკვე ფეხზე წამოდგომა და სიარულიც შეუძლია

როგორც პოლიტიკოსი ამბობს, ახლა მას დამოუკიდებლად წყლის დასხმა ან ხელში ტელეფონის აღება შეუძლია, თუმცა ცოტა ხნის წინ მას საუბარი არ შეეძლო და ვერავის ვერ ცნობდა.

"ყოველ დილით ჩემთან ექიმი მოდიოდა და მეუბნებოდა: ალექსეი, დაფას მოვიტან, მოდი მოვიფიქროთ, რომელი სიტყვა დავწეროთ ზედ. ეს საგონებელში მაგდებდა, რადგან კი ვიცოდი ექიმს რა უნდოდა ჩემგან, მაგრამ ვერ ვხვდებოდი სიტყვები საიდან მომეტანა", — ყვება ნავალნი.

ოპოზიციონერი აღნიშნავს, რომ კიბეებზე სიარულის დრო ფეხები უკანკალებს,ს თუმცა ახლა იმას ხვდება, რომ მის წინ კიბეა:

"ადრე უბრალოდ დავდგებოდი და ვუყურებდი".

20 აგვისტოს ალექსეი ნავალნი ტომსკი-მოსკოვის თვითმფრინავში შეუძლოდ გახდა და გონება დაკარგა, რის შემდეგაც თვითმფრინავი ომსკში დაეშვა და პოლიტიკოსი საავადმყოფოში გადაიყვანეს.

ნავალნის ახლობლები ითხოვდნენ, რომ იგი სამკურნალოდ უცხოეთში გადაეყვანათ. რუსი ექიმები კი აცხადებდნენ, რომ მძიმე მდგომარეობაში მისი გადაყვანა საშიში იქნებოდა. თუმცა 22 აგვისტოს პოლიტიკოსი გერმანიაში გადაიყვანეს.

სექტემბრის დასაწყისში გერმანიის მთავრობამ განაცხადა, რომ ნავალნი "ნოვიჩოკის" ჯგუფის საწამლავით მოწამლეს. რუსულმა მხარემ მოწამვლასთან ყველანაირი კავშირი უარყო და განაცხადა, რომ ომსკის კლინიკაში გაკეთებულ ანალიზში საწამლავის კვალი არ ჩანდა.

7 სექტემბერს კლინიკა შარიტემ განაცხადა, რომ ოპოზიციონერი სამედიცინო კომიდან გამოიყვანეს და ხელოვნური სუნთქვის აპარატიდან მოხსნეს. ამასთან, იგი გარშემომყოფების მიმართვაზე რეაგირებს.