პროკურატურაში აცხადებენ, რომ საქმის მასალებში არსებობს ჩანაწერი, სადაც თამარ ბაჩალიაშვილი ტყეში თვითმკვლელობაზე საუბრობს.

"ვადასტურებთ, რომ ნამდვილად არის ვიდეოჩანაწერები, სადაც ბაჩალიაშვილი საუბრობს ტყეში თვითმკვლელობით სიცოცხლის დასრულებაზე. ზოგადად, ის ვიდეომასალა მოპოვებულ იქნა მისი ტელეფონიდან და YouTube-ის არხიდან. მძიმე მოსასმენია, რადგან ბაჩალიაშვილის მძიმე ფსიქოლოგიურ მდგომარეობას ასახავს", — განაცხადე ბრიფინგზე.

პროკურატურამ დღეს, 18 სექტემბერს გაასაჯაროვა ექსპერტიზის დასკვნა, რომლითაც დგინდება, რომ თამარ ბაჩალიაშვილის გარდაცვალების მიზეზი მედიკამენტური ინტოქსიკაციაა. უწყებაში აცხადებენ, რომ ბაჩალიაშვილის ცხედარს მექანიკური დაზიანების რაიმე ნიშნები, მათ შორის ინექციის კვალი არ აღენიშნება.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილი იყო.

საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლელობამდე მიყვანის მუხლი დაემატა.