საქართველოს ენერგეტიკის და წყალმომარაგების მარეგულირებელი კომპანიის (სემეკი) დღევანდელი სხდომის გადაწყვეტილებით, ელექტროენერგიის ტარიფი თელასის კომერციული მომხმარებლისთვის გაძვირდება, საუბარია აბონენტებზე, რომელსაც კომპანია თელასი ემსახურება.

კერძოდ, 110-35კვ 0,446 თეთრით გაიზარდა და 12,324 თეთრი შეადგინა. ხოლო, 10-6-3,3 კვ/სთ შემთხვევაში 0,035-იანი ზრდა დაფიქსირდა და 12,981 თეთრი შეადგინა.

ამასთან, უცვლელი დარჩება მოსახლეობის სამომხმარებლო ტარიფი. გადაწყვეტილებას სემეკის სხდომაზე კენჭი რამდენიმე წუთის წინ უყარეს. სემეკის გადაწყვეტილებით დადგენილება ამოქმედდება 2017 წლის პირველი იანვრიდან.

გასულ კვირაში სემეკმა თბო და ჰიდროელექტროსადგურებისთვის ელექტროენერგიის წარმოების ტარიფები განიხილა. კომისიის გადაწყვეტილებით, თბოელექტროსადგურებს ელექტროენერგიის წარმოების ტარიფი გაიზარდა, ჰიდროელექტროსადგურების შემთხვევაში კი ტარიფი შემცირდა.