ათასობით ბელარუსელი მთელი ქვეყნის მასშტაბით უკვე ხუთ კვირაზე მეტია ქვეყნის ლიდერის, ალექსანდრე ლუკაშენკოს წინააღმდეგ საპროტესტო აქციებს მართავს. ამ პროცესებში კი ქალებმა განსაკუთრებუთ მნიშვნელოვანი როლი ითამაშეს არაერთი კუთხით.

პოლიცია თუ სხვა შეიარაღებული ძალები ანტისამთავრობო პროტესტის მონაწილეებს სისტემატურად აპატიმრებენ და როგორც ოპოზიციური ძალები ირწმუნებიან, მათ შემდეგ ფიზიკურად უსწორდებიან და აწამებენ.

სწორედ ამის გასაპროტესტებლად ხელოვანმა იანა ჩერნოვამ ახალი ნახატი შექმნა, რომელიც შემზარავი გამოსახულებით სისტემური ძალადობის საშინელებას გვაჩვენებს: სისხლისფრად შეღებილ იატაკზე, რომელსაც ბელარუსის მოხაზულობა აქვს, შიშველი ქალი წევს, ხოლო მისი სხეული იისფერი, მწვანე და ყვითელი დალურჯებებითაა აჭრელებული.

ფოტო: Yana Chernova / REUTERS

"ყველაფერი, რაც ჩვენთან ხდება, გაუმართლებელი ბოროტებაა ხალხის, გოგოების წინააღმდეგ. ეს არის განადგურება ყველაფრისა, რაც მშვენიერი, ნაზი და თბილია. ეს პროცესები არა მხოლოდ ქალების, არამედ მთლიანად ბელარუსელი ხალხის წინააღმდეგაა მიმართული", — აცხადებს მხატვარი.

როგორც უკვე აღვნიშნეთ, საპროტესტო აქციების ფარგლებში პოლიციასა და ხელისუფლების წარმომადგენლებს ძალის გადაჭარბებაში ადანაშაულებენ, რასაც ლუკაშენკოს მთავრობა უარყოფს. ქვეყნის შინაგან საქმეთა მინისტრმა კი წამების ფაქტებთან დაკავშირებით კომენტარი არ გააკეთა.

იანა ჩერნოვას ნახატში წითელი და თეთრი ფერი დომინირებს, რაც შემთხვევითი არ არის: როგორც ნამუშევრის ავტორი ადასტურებს, მან ეს ფერები ბელარუსის ისტორიული თეთრი-წითელი დროშის შესაფერისად აარჩია, რაც ბოლოდროინდელი პროტესტის სიმბოლოდ იქცა.

მხატვარი, რომელიც ამჟამად მოსკოვის ხელოვნების აკადემიის ფინალურ კურსზეა, აცხადებს, რომ ის ყოველთვის კრიტიკულად იყო განწყობილი ბელარუსის ხელისუფლების მიმართ:

"ამ რეჟიმში დავიბადე და გავიზარდე, რის გამოც ვნახე და მოვისმინე ისტორიები იმის შესახებ, თუ რა ხდებოდა და ხდება დღემდე. ადამიანების გაუჩინარება, მოკვლა და გატაცება ბელარუსელი ხალხისთვის ახალი არ არის. ეს ყოველთვის ასე ხდება და არ ვიცი, როგორ შეუძლია ვინმეს, მსგავს მმართველებს დაუჭიროს მხარი".