საქართველოს საკონსტიტუციო კომისიის პირველი სხდომა დაახლოებით 2 საათზე დაიწყო და ამ დრომდე არ დასრულებულა. კომისია 4 სამუშაო ჯგუფად დაიყოფა და სხვადასხვა მიმართულებით გააგრძელებენ მუშაობას.

კომისიაში, რომლის მიზანიც კონსტიტუციაში ცვლილებების შეტანის მიზნით კანონპროექტის მომზადებაა, საქართველოს პრეზიდენტი და ადმინისტრაციის თანამშრომლები არ მონაწილეობენ.

“დღეს გვაქვს უნიკალური შანსი, ისტორიული შანსი, რომ ერთხელ და სამუდამოდ, ჩამოვაყალიბოთ ისეთი დოკუმენტი, ისეთი კონსტიტუცია, ქვეყნის ძირითადი კანონი, რომელიც იქნება სრულ შესაბამისობაში კონსტიტუციური სამართლის ფუნდამენტურ პრინციპებთან,” - განაცხადა საკონსტიტუციო კომისიისა და საქართველოს პარლამენტის თავმჯდომარემ, ირაკლი კობახიძემ, რომელიც იმედოვნებს, რომ პრეზიდენტის ადმინისტრაციის თანამშრომლები ჩაერთვებიან პროცესში.

„ჩვენი ამოცანა და სურვილია ამ რთულ პროცესში გამოვიყენოთ ის უნიკალური შესაძლებლობა, რომელიც ჩვენ მოგვეცა, რომ ერთხელ და სამუდამოდ, გვქონდეს კონსტიტუცია, რომელიც გაუძლებს დროს“, - აღნიშნა, თამარ ჩუგოშვილმა, რომელიც კომისიის მდივანია.

კომისიის შემადგენლობაში არიან ქართული ოცნების, მათ შორის პარლამენტის თავმჯდომარე, ნაციონალური მოძრაობის, პატრიოტთა ალიანსის, პარლამენტის დამოუკიდებელი დეპუტატი - სალომე ზურაბიშვილი, არასაპარლამენტო ოპოზიციისა და არასამთავრობო ორგანიზაციების წარმომადგენელები.