წყვილმა ქორწინების იუბილე იმავე სამოსში აღნიშნა, რაც 60 წლის წინ ეცვა

რა არის ხანგრძლივი და ბედნიერი ქორწინების ფორმულა? ერთმა ნებრასკელმა წყვილმა ეს ნამდვილად იცის. 88 წლის მარვინ სტოუნმა და 81 წლის ლუსილ სტოუნმა სულ ახლახან, მეტად ორიგინალური ფორმით აღნიშნეს ქორწინების 60 წლის იუბილე. საქორწინო სამოსში გამოწყობილმა ხელჩაკიდებულმა წყვილმა ნებრასკის ერთ-ერთ მდელოზე იცეკვა და ფოტოსესიაც მოაწყო.

ისინი 1960 წელს დაქორწინდნენ ნებრასკის ქალაქ სტერლინგის ლუთერანულ ეკლესიაში. ამ დროისთვის მარვინი თითქმის 29 წლის, ლუსილი კი 22 წლის იყო. ახლა კი, როცა მათ ერთად გადაიტანეს ჭირი და ლხინი, მწუხარება და სიხარული, მათი სიყვარულის აღსანიშნავად დრო მიეცათ. წყვილს სამი შვილი, ექვსი შვილიშვილი და ოთხი შვილთაშვილი ჰყავს.

ორივე მათგანი — ლუსილიც და მარვინიც — მასწავლებლები იყვნენ ნებრასკას ერთ-ერთ პატარა ქალაქში. სწორედ იმ სკოლაში გაიცნეს ერთმანეთი, სადაც ერთად ასწავლიდნენ, ერთი წლის შემდეგ კი დაქორწინებაც გადაწყვიტეს.

"ეს ფოტო პატარა ეკლესიაშია გადაღებული, რომელიც აღარ არსებობს, ამიტომ ძალიან ძვირფასი სურათია ჩვენთვის", — ამბობს ლუსილი შავ-თეთრ ფოტოზე, რომელზეც წყვილი საკურთხეველთან დგას.

2020 წელსაც ყველაფერი ზუსტად ისე იყო, როგორც 60 წლის წინ: ლუსის მომხიბვლელი ყაითნიანი კაბა ეცვა, რომელიც თავის დროზე თავად შეკერა, მარვინს კი — ელეგანტური სმოკინგი "პეპელა" ჰალსტუხით. საქორწინო სამოსით ფოტოსესიის მოწყობის იდეა, რასაკვირველია, ლუსილს ეკუთვნოდა.

"ჩემთვის დიდი პატივი იყო, ასეთი გამორჩეული წყვილი სიყვარული სურათებზე აღმებეჭდა. ფოტოსესიისას ცხადზე ცხადი იყო, როგორ ზრუნავენ ისინი ერთმანეთზე. კამერის მიღმა ცრემლიც კი მომადგა თვალზე. ისინი ამტკიცებენ, რომ ნამდვილი სიყვარული დროის გამოცდას უძლებს. ეს ფოტოსესია არასდროს დამავიწყდება", — ამბობს ქეითი ოტრი, რომელმაც წყვილის ქორწინების საიუბილეო ფოტოები გადაიღო.

როგორც ჩანს, გადაღებული სურათები იმდენად მოეწონათ მარვინს და ლუსილს, რომ ფოტოგრაფს ხანგრძლივი ურთიერთობის რჩევები და საიდუმლოებები გაუზიარეს, რომელიც ოტრიმ საკუთარ ფეისბუქგვერდზეც გამოაქვეყნა:

იმუშავეთ თავდაუზოგავად
სიკეთით და მზრუნველობით მოეპყარით ერთმანეთს
სანამ რამეს იტყვით, დაფიქრდით
თქვენს სისუსტეებზე გასამარჯვებლად ერთმანეთის სიძლიერე გამოიყენეთ
რწმენით გაძლიერდით.

"მის მიმართ ზუსტად ის გრძნობა მაქვს, რაც მაშინ მქონდა, საკურთხევლის წინ რომ ვიდექით", — ამბობს ლუსილი, — "აღმასვლის და დაღმასვლის პერიოდები გვქონდა და ისიც უნდა აღვნიშნო, რომ ჩვენი ქორწინება სრულყოფილი არ ყოფილა. თუმცა, როცა დაბრკოლებას აწყდები, უნდა გადალახო და ცხოვრება განაგრძო".

ბოლო ამბები:

გირჩევთ