რუსმა ოპოზიციონერმა, ალექსეი ნავალნიმ მოწამვლის შემდეგ შარიტეს კლინიკიდან ინსტაგრამზე პირველი პოსტი გამოაქვეყნდა. გარდა ამისა, მან ცოლთან და შვილებთან ერთად ფოტო გაასაჯაროვა.

"გამარჯობა, ეს ნავალნია. ყველანი მენატრებით. ჯერ კიდევ თითქმის არაფერი შემიძლია, თუმცა გუშინ მთელი დღე დამოუკიდებლად ვსუნთქავდი. მთლიანად თვითონ. არავითარი დახმარება არ დამჭირდა. ძალიან მომეწონა. გასაოცარი, ბევრისგან დაუფასებელი პროცესი. რეკომენდაციას ვიძლევი", — წერს ნავალნი.

გუშინ 14 სექტემბერს, კლინიკაში განაცხადეს, რომ პოლიტიკოსის მდგომარეობა უმჯობესდება და მას საწოლიდან წამოდგომაც შეუძლია.

20 აგვისტოს ალექსეი ნავალნი ტომსკი-მოსკოვის თვითმფრინავში შეუძლოდ გახდა და გონება დაკარგა, რის შემდეგაც თვითმფრინავი ომსკში დაეშვა და პოლიტიკოსი საავადმყოფოში გადაიყვანეს.

ნავალნის ახლობლები ითხოვდნენ, რომ იგი სამკურნალოდ უცხოეთში გადაეყვანათ. რუსი ექიმები კი აცხადებდნენ, რომ მძიმე მდგომარეობაში მისი გადაყვანა საშიში იქნებოდა. თუმცა 22 აგვისტოს პოლიტიკოსი გერმანიაში გადაიყვანეს.

სექტემბრის დასაწყისში გერმანიის მთავრობამ განაცხადა, რომ ნავალნი "ნოვიჩოკის" ჯგუფის საწამლავით მოწამლეს. რუსულმა მხარემ მოწამვლასთან ყველანაირი კავშირი უარყო და განაცხადა, რომ ომსკის კლინიკაში გაკეთებულ ანალიზში საწამლავის კვალი არ ჩანდა.

7 სექტემბერს კლინიკა შარიტემ განაცხადა, რომ ოპოზიციონერი სამედიცინო კომიდან გამოიყვანეს და ხელოვნური სუნთქვის აპარატიდან მოხსნეს. ამასთან, იგი გარშემომყოფების მიმართვაზე რეაგირებს.