დასავლეთ საქართველოს სამედიცინო ცენტრის განცხადებით, მათ ჰოსპიტალში ერთ-ერთი ექიმისთვის კორონავირუსის დადასტურების შემდეგ, მასთან ახლო კონტაქტში მყოფი ყველა პირი თვითიზოლაციაში და საკარანტინო სივრცეებში გადაიყვანეს. ამ დროისათვის დაკეტილია საავადმყოფოში B ბლოკი, გადაუდებელი დახმარების ცენტრი.

როგორც პრესსამსახურში აცხადებენ, სამედიცინო ცენტრის ერთ-ერთ ექიმს კოვიდ 19 გუშინ 10 სექტემბერს დაუდგინდა. შაბათს აღნიშნული ექიმი, თბილისში, ერთ-ერთ ღონისძიებაზე იმყოფებოდა.

ჰოსპიტალში განმარტავენ, რომ შემთხვევის იდენტიფიცირება კლინიკური ნიშნების გამოვლენამდე მოხდა, რაც ვირუსის გავრცელების არეალს მინიმუმამდე ამცირებს.

"კოვიდისგან გამოწვეული ეპიდსიტუაციის გამო, სხვადასხვა განყოფილებებს შორის მკაცრადაა დაცული ზონირება, პაციენტების ნაკადებისა და სამედიცინო პერსონალის ერთმანეთთან შემხებლობა მინიმუმამდეა დაყვანილი. საუბარია ჰოსპიტალიზირებულ პაციენტებზე", — აცხადებენ დასავლეთ საქართველოს სამედიცინო ცენტრში.

მათივე ინფორმაციით, დადგენილი პროტოკოლის თანახმად, ჰოსპიტალში დასაქმებულ თანამშრომლებს გეგმიურ რეჟიმში, 2 კვირაში ერთხელ უტარდებათ PCR ტესტირება.

კლინიკაში, ასევე, აღნიშნავენ, რომ დაინფიცირებულ ექიმს ჰოსპიტალის C ბლოკთან შემხებლობა არ ჰქონდა, სადაც ნეონატალური და სამეანო განყოფილებებია განთავსებული.