The Insider, Bellingcat და Der Spiegel წყაროებზე დაყრდნობით წერენ, რომ რუსი პოლიტიკოსი ალექსეი ნავალნი სრულად გონს მოვიდა და საუბარიც შეუძლია. გამოცემების ინფორმაციით, ნავალნის, სავარაუდოდ, მოწამვლის მოვლენების გახსენებაც შეუძლია.

ამასთან, ოპოზიციონერთან მნახველების შეშვებაც დაიწყეს, აქამდე მის პალატაში მხოლოდ ექიმებსა და ცოლს უშვებდნენ. The Insider აღნიშნავს, რომ პალატაში შესასვლელად დაცვის სამი კორდონი უნდა გაიარო. წყაროების ინფორმაციით, კლინიკა შარიტეში დაცვა გააძლიერეს. როგორც Der Spiegel წერს, პოლიცია მომავალი თავდასხმებისგან თავის დაზღვევას ცდილობს.

ორშაბათს, 7 სექტემბერს კლინიკა შარიტემ განაცხადა, რომ ოპოზიციონერი სამედიცინო კომიდან გამოიყვანეს და ხელოვნური სუნთქვის აპარატიდან მოხსნეს. ამასთან, იგი გარშემომყოფების მიმართვაზე რეაგირებს.

"პაციენტი გამოყვანილია სამედიცინო კომიდან და მოხსნილია ხელოვნური სუნთქვის აპარატიდან. ჯერ კიდევ ნაადრევია მძიმე მოწამვლის გრძელვადიან შედეგებზე საუბარია", — ნათქვამია კლინიკის განცხადებაში.

20 აგვისტოს ალექსეი ნავალნი ტომსკი-მოსკოვის თვითმფრინავში შეუძლოდ გახდა. მან გონება დაკარგა, რის შემდეგაც თვითმფრინავი ომსკში დაეშვა და პოლიტიკოსი საავადმყოფოში გადაიყვანეს.

ნავალნის ახლობლები ითხოვდნენ, რომ იგი სამკურნალოდ უცხოეთში გადაეყვანათ. რუსი ექიმები კი აცხადებდნენ, რომ მძიმე მდგომარეობაში მისი გადაყვანა საშიში იქნებოდა. თუმცა 22 აგვისტოს პოლიტიკოსი გერმანიაში გადაიყვანეს.

2 სექტემბერს გერმანიის მთავრობამ განაცხადა, რომ ნავალნი "ნოვიჩოკის" ჯგუფის საწამლავით მოწამლეს. რუსული მხარე მოწამვლასთან ყველანაირ კავშირს უარყოფს და აცხადებს, რომ ომსკის კლინიკაში გაკეთებულ ანალიზში საწამლავის კვალი არ ჩანდა.