ვისაც მისტიკა, დრამა და რომანტიკა ერთდროულად იზიდავს, მათთვის ნეტფლიქსს გამორჩეულად დამაინტრიგებელი სიახლე აქვს.

Rebecca — ასე ჰქვია ფილმს, რომელიც ინგლისელმა რეჟისორმა ბენ უიტლიმ სტრიმინგ სერვის ნეტფლიქსთან თანამშრომლობით გადაიღო. ახალი კინოსურათი 1938 წელს დაფნა დიუ მორიეს მიერ გამოქვეყნებული ამავე სახელწოდების მქონე რომანის მიხედვით შეიქმნა, რომლის მილიონობით ეგზემპლარია გაყიდული მთელ მსოფლიოში და დღემდე გოთიკური ლიტერატურის კლასიკურ ნიმუშად ითვლება.

ფილმის პირველი ტრეილერი რამდენიმე საათის წინ გამოქვეყნდა და ის მაყურებელს საოცრად დაძაბულ, შთამბეჭდავ და ემოციურ სანახაობას ჰპირდება:

ახალ კინოსურათში რებეკა მთავარ როლებს Call Me by Your Name-ის ვარსკვლავი არმი ჰამერი და Mamma Mia! Here We Go Again-ის მსახიობი ლილი ჯეიმსი ასრულებენ.

ეს ერთადერთი ახალი პროექტი არ იქნება, რომელშიც 34 წლის ამერიკელ მსახიობ არმი ჰამერს ვიხილავთ: 23 ოქტომბერს დაგეგმილია აგათა კრისტის საკულტო დეტექტივის სიკვდილი ნილოსზე ეკრანიზაციის პრემიერა, რომელშიც ჰამერს პარტნიორობს გალ გადოტი უწევს.

აღსანიშნავია, რომ ეს ახალი ფილმი დაფნა დიუ მორიეს ამ ცნობილი რომანის პირველი ეკრანიზაცია არ არის: 1940 წელს ლეგენდარულმა ალფრედ ჰიჩკოკმა გადაიღო ამავე სახელწოდების ფილმი, რომელმაც ლორენს ოლივიესა და ჯოან ფონტეინის მონაწილეობით ოსკარებზე საუკეთესო სურათის კატეგორიაში გაიმარჯვა.

ახალი ეკრანიზაცია ბენ უიტლიმ გადაიღო, რომელსაც მაყურებელი ისეთი ფილმებით იცნობს, როგორებიცაა Kill List, Sightseers, High Rise და Free Fire. მისი ამ ახალი გაბედული პროექტის შეფასება 21 ოქტომბრიდან შეგვეძლება.