ვისაც ჩახლართული სიუჟეტები, დაძაბული ატმოსფერო და დეტექტივების კითხვა უყვარს, მაშინ ეს ახალი ეკრანიზაცია განსაკუთრებულად დააინტერესებს.

Death on the Nile აგათა კრისტის ამავე სახელწოდების მქონე რომანის მიხედვით გადაიღეს. იმასთან ერთად, რომ აგათა კრისტი კაცობრიობის ისტორიაში დეტექტივების ერთ-ერთი ყველაზე გენიალურ ავტორად ითვლება, რომანს სიკვდილი ნილოსზე მის გამორჩეულ შემოქმედებაშიც კი განსაკუთრებული ადგილი უჭირავს. შესაბამისად, ეკრანზე გაცოცხლებული ეს ისტორია, წესით, არ მოგვაწყენს.

"გეკითხებით, ოდესმე გყვარებიათ ვინმე ისე, რომ ეჭვიანობით შეპყრობილს ვიღაცის მოკვლაც კი შეგეძლოთ? ჩადენილი დანაშაული მკვლელობაა, ერთ-ერთი თქვენგანი კი მკვლელია", — გვესმის ტრეილერში ლიტერატურული სამყაროს ლეგენდარული გამომძიებლის, ერკიულ პუაროს სიტყვები.

როგორც წიგნის, ასევე ამ ახალი ეკრანიზაციის სიუჟეტი სასიყვარულო სამკუთხედის ირგვლივ განვითარებულ მოვლენებზე მოგვითხრობს, რომელიც დაუნდობელ კრიმინალურ დანაშაულსაც მოიცავს. მაყურებელთან ერთად ამ ისტორიაში სიმართლის გარკვევას კი სწორედ ერკიულ პუარო შეეცდება.

ამ ჩახლართული გამოძიების გმირებს კი ეკრანებზე ყველასათვის კარგად ნაცნობი სახეები გააცოცხლებენ: გალ გადოტი, არმი ჰამერი, ემა მაკი, ტომ ბეიტმენი, ლეტიშა რაიტი და სხვა.

აღსანიშნავია, რომ ამ ახალი მაღალი მოლოდინების მქონე ფილმის რეჟისორი კენეტ ბრანაა. თანაც ეს მისი აგათა კრისტის რომანის მიხედით გადაღებული პირველი ფილმი არ არის: 2017 წელს სწორედ თავად გადაიღო ასევე ვარსკვლავური შემადგენლობით მკვლელობა აღმოსავლეთის ექსპრესში. ამ ორივე ფილმში რეჟისორის აპლუასთან ერთად თავად მოირგო ერკიულ პუაროს როლიც.

ეს რომანის სიკვდილი ნილოსზე პირველი ეკრანიზაცია არ არის: 1978 გადაღებულ იმავე სახელწოდების დეტექტივში ბეტი დევისი, მია ფეროუ და მეგი სმიტი თამაშობენ.

თანამედროვე ეკრანიზაციის პრემიერა 23 ოქტომბერსაა დაგეგმილი და სწორედ მაშინ შევძლებთ ჩვენც შევაფასოთ, უშველის თუ არა გალ გადოტის მშვენიერება და არმი ჰამერის მომხიბვლელობა ყველაფერს.