საქართველოს პროკურატურა აცხადებს, რომ თამარ ბაჩალიაშვილის ადვოკატი, მიხეილ რამიშვილის მიერ გასაჯაროებულ ფოტოებზე ექსპერტიზას ჩაატარებს. როგორც უწყებაში ამბობენ, მათ ფოტომასალასთან დაკავშირებით ადვოკატისგან ინფორმაცია მოითხოვეს, თუმცა რამიშვილმა ის არ წარადგინა.

გუშინ, 8 სექტემბერს რამიშვილმა განაცხადა, რომ სატელიტის კადრებით დგინდება, რომ 19-20 ივლისს ბაჩალიაშვილის მანქანა ავტობანთან ახლოს, მინდორზე, ანუ იქ, სადაც იგი იპოვეს, არ იდგა.

"ვინაიდან აღნიშნული ფოტოების მიხედვით არ ირკვევა მისი წარმოშობის წყარო, კერძოდ, არ არის მითითებული ვებგვერდი, სატელიტური თანამგზავრი, კომპანია, ქვეყანა და სხვა მაიდენტიფიცირებელი მონაცემები, მიხეილ რამიშვილს შეეთავაზა მიეთითებინა კონკრეტული სატელიტური თანამგზავრის და მისი მფლობელის მონაცემები, ასევე დაესახელებინა წყარო, ვისი მეშვეობითაც მოიპოვა აღნიშნული ფოტოები, რათა გამოძიების მიერ მომხდარიყო ოფიციალური საერთაშორისო სამართლებრივი წყაროებით გადამოწმება და გამოთხოვა. საგამოძიებო უწყებაში, მიხეილ რამიშვილმა უარი განაცხადა კომპანიის და კონკრეტული წყაროს დასახელებისგან", — აცხადებენ პროკურატურაში.

მათივე თქმით, მიხეილ რამიშვილმა წარმოადგინა მხოლოდ 2 ფოტო და ვინაიდან არ წარმოუდგენია მათი წარმომავლობის წყარო და შესაბამისი მონაცემები, პროკურატურა ვერ იმსჯელებს აღნიშნული ფოტომასალის ნამდვილობაზე.

"აქედან გამომდინარე, რადგან არსებობს აღნიშნული ფოტოების ავთენტურობის ეჭვი, იმის დადგენის მიზნით ხომ არ არის აღნიშნულ ფოტომასალაზე მონტაჟის კვალი, ჩატარდება შესაბამისი ექსპერტიზა", — ნათქვამია უწყების განცხადებაში.

პროკურატურის მტკიცებითვე, მათ სატელიტით გადაღებული ფოტოების მოძიებისთვის მათ პარტნიორი ქვეყნების, მათ შორის აშშ-ს სამსახურებს, ევროპოლსა და კერძო კომპანიებს მიმართეს.

თამარ ბაჩალიაშვილის ოჯახი სატელიტით გადაღებული ფოტოების გასაჯაროებას ითხოვს, რათა დადგინდეს იდგა თუ მისი მანქანა იქ 18 ივლისის შემდეგ. მიხეილ რამიშვილი ამბობს, რომ მის მიერ მოპოვებულ ფოტოებში მანქანა აღმოჩენის ადგილას 19-20 ივლისს არ იდგა.

რაც შეეხება სხვა დღეებს, რამიშვილი ამბობს, რომ 18, 21 და 22 რიცხვებში მოღრუბლულობა იყო, ამიტომ რთულია, იმის გარჩევა, იდგა თუ არა მანქანა იმ ტერიტორიაზე. ადვოკატის თქმით, გამოჩნდნენ ადამიანები, ვინც მას სატელიტის კადრების მოპოვებაში დაეხმარნენ. იგი, ასევე, აღნიშნავს, რომ სატელიტის კადრებში ასახული ადგილის კოორდინატები გადამოწმებულია და ზუსტად ის ტერიტორიაა, სადაც ბაჩალიაშვილის მანქანა აღმოაჩინეს.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილი იყო.

საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლელობამდე მიყვანის მუხლი დაემატა.