პროკურატურის განცხადებით, ვიდეოკადრები, რომელიც გიორგი შაქარაშვილის საქმის ბრალდებულების საკნებშია გადაღებული და ტელევიზიით გავრცელდა, სასამართლოს განჩინების საფუძველზე მოიპოვეს. უწყების თქმით, მათ საკნებში მოპოვებული ფარული ვიდეო-აუდიო მასალები მტკიცბეულებების სახით საქმეს ერთვის.

"ზემოაღნიშნული მასალა, საპროცესო კანონმდებლობის შესაბამისად, განსაიდუმლოების შემდეგ სხვა მტკიცებულებებთან ერთად, ბრალდების მხარემ 2020 წლის 3 სექტემბერს გადასცა მხოლოდ დაცვის მხარეს. აღნიშნული ჩანაწერების წარმომავლობასთან დაკავშირებით ყველა სხვა სახის ინტერპრეტაცია არ შეესაბამება სიმართლეს", — განაცხადეს უწყებაში.

ტელეკომპანია პირველი ვიდეოკადრებს ავრცელებს, რომელიც გლდანის ციხეშია გადაღებული და მასზე გიორგი შაქარაშვილის მკვლელობაში ბრალდებულები არიან ასახული. ჩანაწრებში ისმის, სავარაუდოდ, ნიკოლოზ რევაზიშვილისა და ზ.ხ.-ს საუბრები.