ევროპული საქართველოს საარჩევნო შტაბის ხელმძღვანელი, სერგი კაპანაძე, ეროვნულ-დემოკრატიული ინსტიტუტის (NDI) განცხადებას ეხმაურება.

სერგი კაპანაძის თქმით, მიუხედავად იმისა, რომ ოქტომბრის არჩევნებზე ეროვნულ-დემოკრატიულ ინსტიტუტს მრავალრიცხოვანი დამკვირვებლები არ ეყოლება, ხელისუფლებას ილუზია არ უნდა ჰქონდეს, რომ არჩევნები დაკვირვების გარეშე ჩაივლის, რადგან დამკვირვებლებს მრავალი საერთაშორისო ორგანიზაცია გზავნის. დეპუტატის აზრით, ძალიან მნიშვნელოვანია, რომ ეროვნულ-დემოკრატიული ინსტიტუტი აქტიურ მონიტორინგს გაუწევს არჩევნებს სხვადასხვა სახით.

"ჩვენ ვნახეთ ეროვნულ-დემოკრატიული ინსტიტუტის განცხადება, არჩევნების ღიად და გამჭირვალედ ჩატარებასთან დაკავშირებით, აბსოლუტურად ვეთანხმებით იმ მოსაზრებებს, რომლებიც არის გამოთქმული ამ განცხადებაში. რა თქმა უნდა, კარგი იქნებოდა, რომ ადგილზე მეტი დამკვირვებელი ყოფილიყო NDI-დან, თუმცა დამკვირვებლები გვეყოლება სხვა საერთაშორისო ორგანიზაციებიდან. შესაბამისად, თუ ვინმეს ჰქონდა ილუზია, ან კიდევ აქვს ილუზია, რომ ჯერ კიდევ არჩევნები დაკვირვების გარეშე ჩაივლის, ეს ასე არ იქნება. რაც მნიშვნელოვანია, NDI აპირებს, რომ წინასაარჩევნო პროცესს დააკვირდეს და ყველა იმ თემას, რაც აწუხებს საზოგადოებას, ჩვენ საერთაშორისო პარტნიორებს, იქნება ეს დაშინება, მოსყიდვა, სხვადასხვა ტიპის დარღვევა ან კანონის არასათანადოდ შესრულება და მისი ცალმხრივად შესრულება, ამ ყველაფრის მონიტორინგს ის შეასრულებს.

რაც შეეხება იმ კონკრეტულ მოსაზრებას, რომ მნიშვნელოვანია პარტიებმა თავიანთი პროგრამები ღიად გააცნონ საზოგადოებას და გადაწყვეტილება მიიღონ მოქალაქეებმა პარტიების პროგრამებიდან გამომდინარე, ეს არის სწორედ ის, რასაც ევროპული საქართველო აკეთებს. ჩვენი ამოცანაა, რომ ეს გადამწყვეტი ცვლილებები შევთავაზოთ საზოგადოებას, ცვლილებები, რომლებიც დღეს არსებული ამ კრიზისული მდგომარეობიდან წინ წაიყვანს ქვეყანას და ჩვენ სწორედ იდეების მიტანა გვინდა საზოგადოებასთან და იმის ახსნა, რომ ძველებური მეთოდები არ მიგვიყვანს კარგ შედეგამდე. სწორედ ამიტომ ვთავაზობთ, რომ ევროპული საქართველო იყოს კომპასი გადამწყვეტი და გარდამტეხი ცვლილებებისთვის. შესაბამისად, NDI-ს მოსაზრებებს ევროპული საქართველო ფუნდამეტურად იზიარებს", — აცხადებს სერგი კაპანაძე.