ევროპული საქართველოს წევრი, გიორგი კანდელაკი, ადამ კიზინგერის განცხადებას ეხმაურება. კანდელაკის თქმით, ის ფაქტი, რომ პატრიოტთა ალიანსი არის ქართული ოცნების ნაწილი, სტრატეგიულ პარტნიორს შეუმჩნეველი არ დარჩება. კანდელაკმა აღნიშნა, რომ რუსეთისა და პატრიოთა ალიანსის კავშირის შესახებ გამოძიების დაწყებაზე უარის თქმით, ქართულმა ოცნებამ კიდევ ერთხელ დასვა ტოლობის ნიშანი საკუთარ თავსა და პატრიოტთა, სინამდვილეში კი, მოღალატეთა ალიანსს შორის.

"ის, რომ ე.წ პატრიოტთა და სინამდვილეში მოღალატეთა ალიანსი, არის ქართული ოცნების ნაწილი და გაგრძელება, ეს რა თქმა უნდა, შეუმჩნეველი არ დარჩება არამარტო ჩვენს საზოგადოებას, არამედ ჩვენს პარტნიორებს და მათ შორის მთავარ სტრატეგიულ მოკავშირეს. ასევე, არავის გამორჩება ფაქტი, რომ მიუხედავად ასეთი თვალშისაცემი მტკიცებულებებისა, მოღალატეთა ალიანსის წინააღმდეგ გამოძიების დაწყებაზე პროკურატურამ განაცხადა უარი. ეს იმ პირობებში, როცა იმ ინსტრუქციებს, რომლებიც მათ მიიღეს რუსეთის ფედერაციის პრეზიდენტის ადმინისტრაციიდან, ერთ-ერთი განყოფილების უფროსის სახელით; იმ გზავნილებს, რაც მათ მოწოდებული აქვთ რუსეთისგან, ნათლად ასრულებენ და ამჟღავნებენ ამას ჩვენს საჯარო სივრცეში. გამოძიების დაწყებაზე უარის თქმით კი, ქართულმა ოცნებამ კიდევ ერთხელ საჯაროდ დასვა ტოლობის ნიშანი საკუთარ თავსა და ამ პატრიოტთა, სინამდვილეში კი მოღალატეთა ალიანსს შორის", — აღნიშნა კანდელაკმა.