ევროპული საქართველოს მაჟორიტარობის კანდიდატი ხელვაჩაურის, ქედის, შუახევისა და ხულოს ოლქში, ტარიელ ნაკაიძე თავის Facebook გვერდზე განცხადებას აქვეყნებს.

ტარიელ ნაკაიძის თქმით, ის მთელი ცხოვრება უსამართლობასა და უთანასწორობას ებრძოდა. ის ამბობს, რომ ბევრ სიახლეს შეიტანს ქართულ პოლიტიკაში. ნაკაიძემ აღნიშნა, რომ ის ყველაფერს იზამს, რათა გააკეთოს ქართული საქმე საქართველოს ერთიანობისა და დემოკრატიული განვითარებისათვის.

"მთელი ჩემი ცხოვრება ვებრძვი უსამართლობას, ჩაგვრას, უპირატესობების მინიჭებას, პრივილეგიებს, დომინანტურ მზერას და ვცდილობ თანასწორობის დაცვას, სამართლიანობის აღდგენას, მეორეხარისხოვანი მოქალაქის გრძნობების დამსხვრევას. ვხდები, რომ ეს ბრძოლა დღითიდღე უფრო მაძლიერებს და მაძლევს შანსს, უფრო მეტად შევძლო დავიცვა და ღიად წარმოვადგინო ჩემი კუთხე და მისი მოსახლეობა (ყველა აღმსარებლობისა).

დიახ, მე მუსლიმი ქართველი ვარ, რა თქმა უნდა ვამაყობ ჩემი რელიგიითა და ქართველობით, მაშასადამე საქართველოს მოქალაქეობით. ასევე, ამაყი ვარ ჩემი სამოქალაქო აქტივობებით და განხორციელებული გარდატეხებით, რაც ჩემს მეგობრებთან ერთად ბოლო რამდენიმე წელიწადში შევძელით. ამიტომ ვფიქრობ, რომ ჩემი პოლიტიკაში ყოფნით ბევრ სიახლეს შევიტან ქართულ პოლიტიკაში", — განაცხადა ნაკაიძემ.

მისი თქმით, მან გადალახა უსამართლოდ იარლიყების მიწებების და შეურაცხყოფის მიყენების საკითხი.

"არ მაღიზიანებს, რადგან ჩემთვის დღეს უფრო მნიშვნელოვანი საქართველოს ერთიანობაა, მისი მრავალფეროვნებითა და კულტურით. მე დღეს შემიძლია საქართველოს ერთიანობისთვის და აღმშენებლობისთის დავდო ერთი აგური, ვერ გამაჩერებს ვერანაირი ტროლების თუ ბოტების შემოტევები.

დარწმუნებული ვარ, აჭარის მოსახლეობის ძალიან დიდ ნაწილს სწორად ესმის ეს ყველაფერი და დამიჭერს მხარს. მომეცემა საშუალება, ვაკეთო ქართული საქმე საქართველოს ერთიანობისთვის, დემოკრატიული განვითარებისთვის", — აცხადებს ტარიელ ნაკაიძე.