გიორგი შაქარაშვილის საქმეზე პროკურატურაში გამართულ საგანგებო ბრიფინგზე პროკურორმა, ამირან გულუაშვილმა განაცხადა, რომ ბრალდების მხარე არასდროს არ განიხილავდა შაქარაშვილის ჩანთას საქმისათვის ყველაზე მნიშვნელოვან და გადამწყვეტ მტკიცებულებად.

მისი თქმით, გამომდინარე იქიდან, რომ დაცვის მხარეს არა აქვს "არგუმენტირებული პასუხები" ბრალდების მხარის პოზიციაზე, გიორგი შაქარაშვილის ჩანთა საქმეში მნიშვნელობას მხოლოდ მათთვის იძენს. პროკურორის განმარტებით, დაცვის მხარე ცდილობს, საქმისათვის ნაკლებად მნიშვნელოვან გარემოებებზე ყურადღების მიპყრობით, შეცდომაში შეიყვანოს საზოგადოება.

"ჩვენ თავიდანვე ვამბობდით, რომ არსებობს გარკვეული კვლევები საექსპერტო, რომელიც უნდა ჩატარდეს, რაც მოგვცემს შესაძლებლობას, დავადგინოთ კონკრეტულად ვის ჰქონდა შემხებლობა ამ ჩანთასთან. ბუნებრივია, ჩანთაზე დნმ-ის აღმოჩენა ვერ იქნებოდა უტყუარი მტკიცებულება დანაშაულებრივი ქმედების განხორციელებისა", — აღნიშნა მან.

1 სექტემბერს ცნობილი გახდა, რომ შუალედური ექსპერტიზის შედეგად გიორგი შაქარაშვილის ჩანთაზე ბრალდებული პირების დნმ არ აღმოჩნდა.

პროკურატურამ შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმა. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.