დოსიეს მიერ პატრიოტთა ალიანსზე გამოქვეყნებულ დოკუმენტებთან დაკავშირებით პარტიის ერთ-ერთი ლიდერი, ირმა ინაშვილი აცხადებს, რომ მალე აჩვენებს "ვინ ვისი ნამდვილი აგენტია და ვინ ვის დაკვეთას ასრულებს". ინაშვილის თქმით, ის მოტივირებულია, რომ ყველას ბოლომდე ჩამოხსნას ნიღაბი.

"არასდროს მიგრძვნია საკუთარ თავში ისეთი ძალა, როგორსაც დღეს ვგრძნობ. პოლიტიკური ბუნკერი უნდა გავიტანოთ. ერთ რამეს ვერ ითვალისწინებენ ისინი, რომლებმაც ყველა მხრიდან "ცეცხლი" გაგვიხსნეს, მხოლოდ მაძლიერებს და თქვენ გასანადგურებლად მიმაღლებს მოტივაციას ეს სამარცხვინო შტურმი. მალე გაჩვენებთ, ვინ ვისი ნამდვილი აგენტი ხართ და ვინ ვის დაკვეთას ასრულებთ. ყველა ერთის, ანუ ჩვენ წინააღმდეგ გაერთიანდით? ოცნება და ნაცების კრიმინალური პოლიტჯგუფები ერთ ხმაში მღერით?! სხვას არც ველოდი თქვენგან. ბნელი მედალი კი არა, ამ ქვეყნის წურბელები ხართ. გამოწოვეთ ქართველ ხალხს სიცოცხლის ენერგია და ხალისი. ადამიანები ცოცხალ გვამებად აქციეთ, ისე გააღატაკეთ. სოხუმი და ცხინვალი კი არა, თქვენი სკამების გარდა, არაფერი გადარდებთ. ცრუ, ფლიდი, მზაკვარი და უწესო ხალხი ხართ. ფარატინა ფურცელი მტკიცებულება ყოფილა და პროკურატურას 56 000 მოწმემ ჩვენება რომ მისცა, ის არაფერი? ახლა გაჩვენებთ, შპიონაჟს ვინ ეწევა და სამშობლოს ვინ ღალატობს. დაგველოდეთ", — წერს ინაშვილი თავის ფეისბუქ პოსტში.

24 აგვისტოს ცენტრ დოსიეს განკარგულებაში აღმოჩნდა სამუშაო დოკუმენტები, ანალიტიკური ანგარიშები, ფინანსური შეფასებები, წინასაარჩევნო მეთოდები და საოპერაციო მოხსენებები დაზვერვის გენერალ ჩერნოვის სამდივნოდან. მათი განცხადებით, ამ დოკუმენტებით ირკვევა, რომ რუსეთი საქართველოს არჩევნებში ჩარევასა და შედეგებზე გავლენის მოხდენას ცდილობს და სასურველი შედეგის მისაღწევად პატრიოტთა ალიანსს აფინანსებს, რომელიც ანტიდასავლური და პრორუსული რიტორიკით გამოირჩევა.

31 აგვისტოს კი პატრიოტთა ალიანსის რუსეთთან კავშირების შესახებ ცენტრმა დოსიემ ახალი მასალები გამოაქვეყნა, რომლებშიც ასახულია რუსული "კონტრარგუმენტები", ალიანსის ლიდერების ოკუპირებულ რეგიონში ვიზიტის გასამართლებლად.

დოსიეს მიერ გამოქვეყნებულ მასალებს გამოეხმაურნენ როგორც მთავრობაში ისე, ოპოზიციაში. ევროპული საქართველოს ლიდერმა, ელენე ხოშტარიამ პროკურატურას პატრიოტთა ალიანსის წინააღმდეგ გამოძიების დაწყების მოთხოვნით 25 აგვისტოს მიმართა. ხოშტარიას თქმით, ნორმალური სახელმწიფოს პროკურატურა მსგავსი ინფორმაციის გამოქვეყნებისთანავე, საგანგებოდ უნდა იწყებდეს გამოძიებას.

პარლამენტის თავმჯდომარის მოადგილე, მამუკა მდინარაძე დოსიეს პატრიოტთა ალიანსზე გამოქვეყნებულ დოკუმენტებთან დაკავშირებით განაცხადა, რომ ელემენტარული მტკიცებულების არსებობის შემთხვევაში ამაზე სახელმწიფო რეაგირებას მოახდენდა.

გაიგეთ მეტი: